Бугун Франция пойтахти Париж шаҳрида шахмат бўйича ўтказилаётган “Freestyle Chess Grand Slam Paris” турнирининг 1-4, 5-8 ҳамда 9-10-ўринлари учун дастлабки кунги мусобақалар бўлиб ўтади.

Кеча поёнига етган 1/4 финали иккинчи кунги мусобақаларида кейинги босқичга йўл оладиган, яъни 1-4, 5-8, 9-10-ўринлар учун курашадиган шахматчилар номи аниқланди.

Кеча нуфузли турнирнинг тўртинчи кунги баҳслари 2-тур ўйинида оқ доналарда ҳаракатланган Нодирбек Абдусатторов Магнус Карлсен билан куч синашди.

Айтиш лозим, ғалабага яқин келган ҳамюртимиз охирги юришлар ҳолатида муросага рози бўлди. Бу эса ўз навбатида, Карлсенга ғолиблик йўлидаги курашни давом эттиришини, Абдусатторовга 5-8-ўринлар учун даъвогарликни тақдим этди.

1/4 финалнинг Винсент Кеймер – Ян Непомняший, Аржун Эригаиси – Хикару Накамура, Максим Ваше-Лаграв – Фабиано Каруана қарама-қаршилигидаги баҳслар натижасида Кеймер, Накамура ва Каруана ярим финалга йўл олди.

Бугун ўтказиладиган ярим финалда Магнус Карлсен Фабиано Каруана билан, Винсент Кеймер Хикару Накамура билан финалчиларни аниқлаб берадиган дастлабки ўйинда рўбарў келса, 5-8-ўринлар учун кечадиган илк баҳсларда Абдусатторов – Максим Ваше-Лаграв ва Ян Непомняший – Аржун Эригаиси қарама-қаршилигидаги ўйинлар бўлиб ўтади.

Шунингдек, 9-10-ўринларга даъвогарлик учун курашда Рамишбабу Праггнанадха Видит Гуджаратини, Ричард Раппорт Гукеш Доммараджуни мағлубиятга учратди.

Умумий мукофот жамғармаси 680 минг АҚШ долларидан иборат турнир 14 апрелга қадар давом этади.

Эслатиб ўтамиз, халқаро турнирда ғолибликка эришган шахматчи 200, 2-ўрин соҳиби 140, 3-ўрин 100, 4-ўрин 60, 5-ўрин 50, 6-ўрин 40, 7-ўрин 30, 8-ўрин 20, 9-ўрин 15, 10-ўрин 10, 11 ва 12-ўриндан жой олганлар 7500 АҚШ долларига эга чиқади.

Т.Рўзиев, ЎзА