Ватанимиз тарихидаги 1 апрель санаси билан боғлиқ айрим воқеалар баёни.
1872 йил (бундан 153 йил олдин) –Туркистон генерал-губернаторлиги таркибида Закот бошқармаси ташкил эгилди. Мазкур ташкилот аслида маҳаллий закотчиларга ишонмаслик натижасида вужудга келган эди. Закот бошқармаси 1874 йил 10 ноябрга қадар Тошкент шаҳар ярмарка қўмитасига бўйсунган. Унинг асосий вазифалари Туркистон ўлкасига келган ёки ундан чиқиб кетаётган карвонларни рўйхатга олиш, юкларнинг қийматини аниқлаш, юклар ва чорва молларидан закот ундиришдан иборат эди. Кириб келаётган ёки чиқаётган карвонларни назорат қилиш учун чегараларда махсус закот масканлари фаолият юритар эди.
1914 йил (бундан 111 йил олдин) – “Садои Туркистон” газетасининг шу кунги сонида Абдулла Қодирий имзоси билан “Янги масжид ва мактаб” сарлавҳали хабар босилди. Бу йигирма ёшли бўлажак адибнинг матбуотдаги дастлабки чиқиши эди. Шу тариқа 1914 йилнинг 1 апрелидан матбуотда Абдулла Қодирий номи пайдо бўлди. Орадан кўп ўтмай худди шу ном остида “Миллатимга”, “Аҳволимиз” шеърлари, “Бахтсиз куёв” драмаси, “Жувонбоз” ҳикояси чиқди. Шу вақтдан бошлаб оддий хабарнавис Абдулла Қодирий сал фурсатдан сўнг шеъриятда, драма ва насрда куч синаб кўрди.
1921 йил (бундан 104 йил олдин) – Бухорода Ҳамза Ҳакимзода Ниёзий қаламига мансуб саҳна асари намойиш этилди. Бу ҳақда “Бухоро ахбори”газетасида қуйидагича баён тилган: “...1 апрелда Эски Бухородаги Истиқлол майдонида Ҳамза Ҳакимзоданинг 4 пардали асари “Фарғона фожиаси”нинг иккинчи бўлими, ёхуд “Иффат қурбони” пьесасини ўйнадилар. Бундан ташқари театр охирида концерт ва декламациялар ҳам қўйилди. Уйновчилар ўз ролларини жуда яхши адо қилдилар. Айниқса, хотун ила қиз ролини ўйнаган Кузнецова хонум тақдир этарлик даражада яхши ўйнади. Халқ жуда таъсирланди. Хатто, йиғлаганлар ҳам бўлди”.
1926 йил (бундан 99 йил олдин) – Муҳиддин қори Ёқубов раҳбарлигида Юсуфжон Қизиқ, Уста Олим Комилов, Жўрахон Султонов, Мамадбува Сатторов, Тамарахоним ва бошқа санъат усталари, жами 18 нафар аъзоси бўлган илк концерт жамоаси ташкил этилди. Тарихчи Баҳром Ирзаевнинг қайд этишича, 1927 йил баҳорида бу жамоа Ўзбекистон давлат концерт-этнографик труппаси номини олди ва 1926–1929 йиллар давомида мусиқа санъатининг барча жанрларида тинимсиз ижод қилди. Айнан шу Давлат этнографик мусиқа труппаси базасида 1929 йилнинг октябрида биринчи Ўзбек давлат мусиқали театри пайдо бўлди.
1997 йил (бундан 28 йил олдин) – республика солиқ тизимини янада такомиллаштириш ва мустаҳкамлаш, солиқ тўловчиларни ҳисобга олишни тартибга солиш мақсадида, Давлат солиқ қўмитаси томонидан солиқ тўловчиларнинг идентификация рақамларини (СТИР) бериш ва қўллаш тизими жорий этилди.
2017 йил (бундан 8 йил олдин) – Ўзбекистон Республикаси Президентининг “Соғлиқни сақлаш соҳасида хусусий секторни янада ривожлантириш чора-тадбирлари тўғрисида”ги қарори қабул қилинди.
2018 йил (бундан 7 йил олдин) – республикамиздаги фукароларнинг ўзини ўзи бошқариш органларида хотин-кизлар билан ишлаш ва оилаларда маънавий-ахлокий қадриятларни мустаҳкамлаш бўйича мутахассис лавозими жорий этилди.
2020 йил (бундан 5 йил олдин) – Вазирлар Маҳкамасининг қарори билан Тошкент вилояти ҳудудида истеъмолга йўналтирилган картошка ишлаб чиқариш ва чуқур қайта ишлаш бўйича агросаноат кластери ташкил этилди.
2021 йил (бундан 4 йил олдин) – Ўзбекистон Республикасининг “Деҳқон хўжалиги тўғрисида”, “Томорқа хўжалиги тўғрисида” Қонунлари қабул қилинди.
2021 йил (бундан 4 йил олдин) – Ўзбекистон Республикаси Президентининг “Илмий ва инновацион фаолиятни ривожлантириш бўйича давлат бошқаруви тизимини такомиллаштириш тўғрисида”ги фармони ва “Илм-фан соҳасидаги давлат сиёсати ва инновацион ривожлантиришдаги давлат бошқарувини янада такомиллаштириш чора-тадбирлари тўғрисида”ги қарори қабул қилинди.
2022 йил (бундан 3 йил олдин) – Президент қарорига асосан Самарқанд давлат тиббиёт институти Самарқанд давлат тиббиёт университети этиб қайта ташкил этилди.
2024 йил (бундан 1 йил олдин) – Ўзбекистон Республикаси Президентининг “Ихтисослаштирилган мактаблар тармоғини кенгайтириш ва уларнинг фаолиятини янада такомиллаштириш чора-тадбирлари тўғрисида”ги фармони ва “Ижод мактаблари фаолиятини янада такомиллаштириш чора-тадбирлари тўғрисида”ги қарори қабул қилинди.
Алишер ЭГАМБЕРДИЕВ тайёрлади