Euronews канали Эрон ташқи ишлар вазири Аббос Арағчийнинг фикрларини эълон қилди. Вазир Россия ва Хитойни Эроннинг стратегик ҳамкорлари деб атади ва улар билан ҳамкорлик сиёсий, иқтисодий ҳамда ҳарбий соҳаларни қамраб олишини билдирди.

Унинг таъкидлашича, Теҳронга бундай ҳужумлар такрорланмаслиги бўйича кафолат ва товон тўланмагунча АҚШ ва Исроил билан уруш тугамайди.  

“Биз бу ҳолатни ўтган йили ҳам бошдан кечирдик. Ўшанда Исроил ҳужум қилди ва унга АҚШ ҳам қўшилди, кейинчалик улар яна қайта бизга ҳужум қилишди”, — деган у интервьюсида.

У шунингдек, Эрон Россия ва Хитойдан ҳарбий ёрдам олаётганини ҳам маълум қилди. Шу билан бирга, Теҳрон Ҳурмуз бўғозини блокада қилишни давом эттиришини таъкидлади, аммо бу ҳақдаги тафсилотларни очиқламади.

Вазирнинг сўзларига кўра, Яқин Шарқдаги АҚШга тегишли ҳарбий базалар Эронга қарши ҳужумлар учун ишлатилаётганини тасдиқловчи кўплаб далиллар бор. Унинг айтишича, Эронда сунъий йўлдош тасвирлари ва электрон кузатув маълумотлари мавжуд бўлиб, улар минтақадаги АҚШ базалари Эронга қарши ҳужумларда қўлланилганини кўрсатади. Шу билан бирга, Теҳрон минтақадаги ҳамкор давлатлар билан биргаликда комиссия тузиб, қайси объектлар ҳақиқатан ҳам АҚШга тегишли эканини аниқлашга тайёрлигини билдирган.

Шунингдек, Арағчий АҚШ ва Исроил араб давлатлари томон ракета учириш орқали Эрон билан араб мамлакатлари ўртасидаги муносабатларни ёмонлаштиришга уринаётганини билдирган. Унинг таъкидлашича, америкаликлар Эроннинг Shahed дронига ўхшаш учувчисиз аппаратни ҳам ишлаб чиққан.  

Бирлашган Араб Амирликлари Арағчийнинг баёнотларини қоралади. Амирликлар ўзларига қарши қаратилган террорчилик тажовузига нисбатан ўзини ҳимоя қилиш ҳуқуқига эга экани, бироқ мамлакат вазминлик ва мантиқни устувор деб билиб, Эрон ва бутун минтақа учун ечим топишга интилаётгани таъкидланди.

Euronews телеканалига берган интервьюсида БАА давлат вазири Лана Нуссейбе уруш бошланганидан бери Эрон ракеталари ва дронларининг асосий зарбаси айнан Амирликларга тушганини маълум қилди.  

Унинг таъкидлашича, 14 кун давом этган оғир вазиятга қарамасдан, мамлакатда барқарорлик сақланиб қолди ва ҳаёт деярли одатий ҳолатга қайтди.

Арағчий шунингдек, Эроннинг нефть объектлари ёки энергетика инфратузилмасига зарба берилса, минтақадаги америкалик компанияларга тегишли ёки улар улушига эга бўлган ҳар қандай энергетика объектларига жавоб зарбаси берилади.

Кеча АҚШ президенти Дональд Трамп америкалик ҳарбийлар Харк оролидаги барча ҳарбий нишонларга зарба берганини маълум қилди. Бу орол Форс кўрфазининг шимолида жойлашган бўлиб, Эроннинг нефть экспорти учун стратегик марказ ҳисобланади. Шу билан бирга, Арағчий АҚШ мудофаа вазири Пит Хегсетнинг Эроннинг янги олий раҳбари Исроил ва АҚШ зарбаларида яралангани ҳақидаги баёнотини рад этди. Арағчийнинг айтишича, янги олий раҳбар билан ҳеч қандай муаммо йўқ ва вазият тўлиқ назорат остида.                                  

<iframe width="560" height="315" src="https://www.youtube.com/embed/siICxGaP2jg?si=jP-LkR7SyIEGu1xt" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Анвархўжа Аҳмедов, ЎзА