Синтетик наркотиклар савдосига чек қўйилди
Давлат хавфсизлик хизматининг Тошкент шаҳар бўйича бошқармаси ходимлари томонидан шаҳар ИИББ билан ҳамкорликда ўтказилган тезкор тадбирда Юнусобод туманида жойлашган "Уч қаҳрамон" ЙПХ масканида пойтахт ҳудудига кириб келаётган "Спарк" русумли автомашина тўхтатилиб, текширилди.
Натижада, унда йўловчи сифатида кетаётган, 2004 йилда Сурхондарё вилоятида туғилган шахсга тегишли целлофан пакет ичида 200 дона зип пакетларга қадоқланган жами 365 гр "Мефедрон" синтетик наркотик моддаси борлиги аниқланиб, ашёвий далил сифатида олинди.
Сўнгра тезкор тадбир давом эттирилиб, у вақтинчалик истиқомат қилаётган Тошкент туманидаги хонадон кўздан кечирилганда, ушбу манзилдан ҳам 734 гр "Мефедрон", 63 гр "Альфа-ПВП", 45 гр "Спайс", 2 дона электрон тарози, зип-пакетлар ва бошқа ашёлар процессуал тартибда расмийлаштириб олинди.
Аниқланишича, муқаддам ўғирлик билан боғлиқ жинояти учун судланган мазкур шахс ҳозирда интернет наркодўконда "закладчик" сифатида ишлаётган бўлган.
Ҳолат юзасидан унга нисбатан жиноят иши қўзғатилиб, тергов ҳаракатлари олиб борилмоқда.
