Трамп акс этган тилла танга ишлаб чиқарилади
АҚШ Тасвирий санъат комиссияси Қўшма Штатларнинг 250 йиллиги муносабати билан президент тасвири туширилган 24 каратлик эсдалик олтин танга чиқаришга овоз берди.
Овал кабинетдаги Дональд Трамп тасвирланган танганинг бир томонида 1776, иккинчи томонида 2026 рақамлари мавжуд, деб хабар берди “NBC News”.
Ғазначи Брэндон Бич маҳсулотни “чиройли эсдалик олтин танга” деб атади.
- 250 йиллик юбилей яқинлашар экан, мамлакатимиз ва демократиянинг бардавом руҳини мужассам этган танга яратганимиздан хурсандмиз, - деди у. - Бунинг учун амалдаги етакчи рамзидан кўра муносиб танлов йўқ.
2020 йил қабул қилинган Коллекция тангаларини қайта лойиҳалаш тўғрисидаги қонунга кўра, Ғазначилик департаменти 2026 йил 1 январдан бошлаб бир йил муддатга Америка мустақиллигининг 250 йиллигини ифодалайдиган дизайнда 1 долларлик танга чиқариши мумкин.
Аввалроқ демократ сенаторлар Трамп сурати туширилган танга чиқарилишига қарши чиққани хабар қилинган эди.
Г.Сатторова, ЎзА
