“Дўстлик, бағрикенглик ва ўзаро ҳурмат байрами муборак бўлсин” – халқаро ташкилотлар вакилларидан байрам табриги (+видео)
Бугун республикамизнинг барча гўшаларида қутлуғ айём – Наврўз умумхалқ байрами кенг нишонланмоқда. Жумладан, пойтахтимиздаги “Янги Ўзбекистон” боғида ташкил этилган шодиёна ҳам юртдошларимиз хотирасида қолмоқда.
Байрамда иштирок этган турли давлатларнинг Ўзбекистондаги элчилари, халқаро ташкилотлар раҳбарлари ЎзА мухбирига берган интервьюсида халқимизни қизғин қутлади.
Сара НОШАДИ, ЮНЕСКОнинг Ўзбекистондаги ваколатхонаси раҳбари:
– Ўзбек халқини муборак Наврўз айёми билан қутлайман. Тинчлик, хотиржамлик ва барқарор тараққиёт тилайман. Бугун байрамда кийган эгнимдаги атлас ЮНЕСКО 43-сессияси доирасидаги маданий тадбирларда намойиш қилинган ва халқаро майдонда катта қизиқиш билан қарши олинадиган ўзбек миллий либоси. Тўрт йил олдин Ўзбекистонга келганимда атлас ва адрасларни кўриб, ҳайратга тушганман. Бу кийимлар Наврўзу олам – ёшариш байрамига, айниқса ярашади. Ўзбекистоннинг бой маданий меросини дунёга танитамиз, байрам муборак бўлсин.
Ашина ХАЛАКДИНА, Жаҳон соғлиқни сақлаш ташкилотининг Ўзбекистондаги ваколатхонаси раҳбари:
– Ўзбекистонда Наврўз айёмида иштирок этаётганимдан жуда хурсандман. Фурсатдан фойдаланиб, жонажон ўзбек халқини, келажаги буюк мамлакат фарзандларини янгиланиш ва ёшариш байрами билан чин қалбимдан қутлайман. “Янги Ўзбекистон” боғида ташкил этилган катта шодиёнанинг иштирокчиси эканимдан бениҳоят хурсандман. Президент Шавкат Мирзиёев бошчилигидаги мамлакатдаишлаш мен учун шараф. Биз биргамиз. Умумхалқ байрами муборак бўлсин.
Манфред ҲУТЕРЕР, Германиянинг Ўзбекистондаги Фавқулодда ва мухтор элчиси:
– Баҳор фаслининг энг гўзал айёми муборак бўлсин. Ушбу байрам барчамизга янги куч-ғайрат, шижоат ато этсин, юртингизда ҳар кун байрам бўлсин, табриклаймиз, азиз Ўзбекистон халқи.
Сабине МАҲЛ, Бирлашган Миллатлар Ташкилотининг Ўзбекистондаги доимий координатори:
– Бугун Наврўз байрами. Сизларни Ўзбекистонда қадимдан нишонланиб келинаётган, табиатнинг янгиланиши ва эзгулик рамзи бўлган Наврўз байрами билан самимий муборакбод этаман. Бу муборак айём барчамиз учун тинчлик, фаровонлик ва бирдамлик олиб келсин.
Саад бин Носир бин АБДУЛЛОҲ АБУ ҲАЙМЕД, Саудия Арабистонининг Ўзбекистондаги Фавқулодда ва мухтор элчиси:
– Наврўз, дўстлик, бағрикенглик ва ўзаро ҳурмат байрами. Ушбу қутлуғ кунда халқлар ўртасидаги алоқалар янада мустаҳкамланиб, эзгу ниятлар рўёбга чиқсин. Сизларга мустаҳкам соғлиқ, бахт-саодат ва улкан муваффақиятлар тилайман. Наврўз муборак бўлсин.
Видеоинтервьюни ижтимоий тармоқдаги саҳифаларимизда томоша қилинг.
<iframe width="640" height="640" src="https://www.youtube.com/embed/Hc2KQQkn7sM" title="“Do`stlik, bag`rikenglik va o`zaro hurmat bayrami muborak bo`lsin” – xalqaro tashkilotlar" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Беҳруз ХУДОЙБЕРДИЕВ,
Искандар ИСМАТОВ (видео),
ЎзА
