Самарқанд вилояти раҳбарияти олдига камида 9 фоизли иқтисодий ўсиш қилиш вазифаси қўилди
Президент Шавкат Мирзиёев раислигида Нарпай туманида Самарқанд вилоятини ижтимоий-иқтисодий ривожлантириш масалалари бўйича йиғилиш бўлиб ўтмоқда.
Самарқанд вилояти раҳбарияти олдида камида 9 фоизли иқтисодий ўсиш қилиб, ялпи ҳудудий маҳсулотни 144 триллион сўмдан ошириш, 3 миллиард доллар хорижий инвестиция жалб этиб, экспортни 1,2 миллиард долларга олиб чиқиш вазифаси тургани қайд этилди.
100 минг аҳолини доимий ишли қилиш, 31 минг оилани камбағалликдан чиқариб, вилоятни ишсизлик ва камбағалликдан холи ҳудудга айлантириш зарурлиги кўрсатиб ўтилди.
Масалан, Нарпай туманида 240 мингдан зиёд аҳоли яшайди. Ишсизлик 4,9 фоизни, камбағаллик даражаси эса 5 фоизни ташкил қилмоқда. Нарпай саноат бўйича вилоятда 9-ўринда, қишлоқ хўжалиги ва сервис соҳасида 11-ўринда туради.
Бу кўрсаткичларни яхшилаш учун Нарпайга режа қилинган 150 миллиард сўмга қўшимча яна 100 миллиард сўм берилади. Кичик ва ўрта бизнес учун 360 миллиард сўм ресурс ажратилади.
ЎзА
