Жанубда аҳолини онлайн рўйхатдан ўтказиш қандай кечмоқда?
Сурхондарё вилоятида аҳоли ва қишлоқ хўжалигини рўйхатга олиш тадбирларини юқори савияда ташкил этиш учун вилоят, туманлар ва шаҳар штаблари фаолиятини самарали мувофиқлаштириш масалаларига бағишланган кенгайтирилган йиғилиш бўлиб ўтди.
Унда Ўзбекистон Республикаси Фавқулодда вазиятлар вазири ўринбосари Н.Қодиров ва бошқалар мамлакатимизда амалга оширилаётган аҳоли ва қишлоқ хўжалигини рўйхатга олишнинг аҳамияти, юрт тараққиёти ва аҳоли фаровонлигини таъминлашдаги ўрни ҳақида атрофлича фикр юритди. Аҳолини онлайн рўйхатдан ўтказиш кўрсаткичлари туманлар ва шаҳар кесимида таҳлил қилинди. Вилоятда мазкур сиёсий-ижтимоий жараённинг сифатли амалга оширилиши бевосита жойлардаги штабларнинг қай даражада тизимли ишлаётганига боғлиқлиги таъкидланди. Аҳоли ўртасида онлайн платформадан фойдаланиш бўйича тарғибот ва тушунтириш ишларини жадаллаштириш зарурлиги қайд этилди.
Йиғилишда, шунингдек, туман ва шаҳар штабларига бириктирилган республика вазирлик ва идораларининг масъул вакилларига жойлардаги ишларни самарали ташкил этиш, юзага келаётган техник ва ташкилий масалаларни зудлик билан ҳал этиш юзасидан тегишли тавсиялар берилди.
Маълумотларга кўра, айни пайтда вилоятда олий таълим муассасаларининг 150 дан ортиқ кўнгилли талабалари жойларда бўлиб, рўйхатга олишнинг техник жиҳатлари ва тартибларини тушунтириш баробарида аҳолини онлайн рўйхатга олишга кўмаклашмоқда. Шу кунгача сурхондарёликлар 143 минг 855 хонадонни онлайн платформа орқали рўйхатдан ўтказган.
Холмўмин Маматрайимов, ЎзА мухбири
