Россиянинг энг йирик нефть компанияларидан бири “Лукойл” хорижий активларини сотишини эълон қилди. Бунга компания ва унинг шуъба корхоналарига нисбатан “баъзи давлатлар томонидан чеклов чоралари жорий этилиши” сабаб бўлди.
“Потенциал харидорларнинг таклифларини кўриб чиқиш бошланди”, дейилади “Лукойл”нинг инглиз тилидаги сайтида.
Активларни сотиш АҚШ Молия вазирлигининг Хорижий активларни назорат қилиш бошқармаси (OFAC) лицензиясига мувофиқ амалга оширилади. Мазкур лицензия “Роснефть” ва “Лукойл” билан боғлиқ битимларни бекор қилишни тартибга солади.
Туркия ва Буюк Британия ўртасида 27 октябрь куни 20 дона Eurofighter Typhoon қирувчи самолётларини харид қилиш бўйича шартнома имзоланди. Бу ҳақда Британия ҳукумати хабар берди. Битим қиймати 8 миллиард фунт стерлинг (тахминан 13,8 миллиард доллар) бўлиб, бу НАТО иттифоқдошлари ўртасидаги мудофаа ҳамкорлигини янада мустаҳкамлайди. Британия Бош вазири Кир Стармер 2024 йилда лавозимга киришганидан бери Туркияга илк бора ташриф буюриб, Анқара шаҳрида президент Ражаб Тоййип Эрдоған билан шартнома имзоланган.
Туркиянинг Синдирги шаҳрида (Баликесир) 6,1 магнитудали зилзила содир бўлди. Бу ҳақда Туркия табиий офатларга қарши кураш бошқармаси (AFAD) хабар берди. Ер силкиниши 27 октябрь куни соат 22:48 да (Тошкент вақти билан 28 октябрь 00:48 да) юз берган. Зилзила ўчоғи деярли 6 километр чуқурликда бўлган. Табиий офат оқибатида учта бино ва дўкон қулаб тушган. Туркия президенти Ражаб Тоййип Эрдоған зилзила қўшни вилоятларда ҳам сезилганини айтди. Унинг сўзларига кўра, жабрланган ҳудудда аллақачон мутахассислар ишламоқда. Баликесир вилоятида содир бўлган 6,1 магнитудали зилзиладан сўнг 102 та афтершок қайд этилган.
Украина Мудофаа разведкаси Россия томонидан Украинага зарба бериш учун фойдаланилган ракеталар ва дронларда 68 та давлатнинг компонентларини аниқлади. Бу ҳақдаги маълумот War&Sanctions portalida эълон қилинди. Сўнгги маълумотларга кўра, Россия фойдаланаётган 9М727 “Искандер-К” қанотли ракетаси, Кҳ-47М2 “Кинжал” аэробаллистик ракетаси, Шимолий Кореянинг КН-23 ва КН-24 баллистик ракеталари ҳамда “Shahed-136” (Россияда “Геран-2”) дронларида хорижий компонентлар аниқланган.
Шимолий Рейн — Вестфалияда полиция йирик миқдорда қурол-аслаҳа омборини аниқлади. Вупперталда душанба, 27 октябрь куни бўлиб ўтган матбуот анжуманида прокурор вакили Волф-Тилман Баумерт маълум қилишича, бу Германиянинг ушбу федерал ердаги «энг йирик жанговар қурол топилмалари»дан бири бўлиши мумкин. Қурол-савдоси билан шуғулланган деб гумон қилинаётган уч киши ҳибсга олинди.
<iframe width="650" height="420" src="https://www.youtube.com/embed/66P4WrTBd6g" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев, ЎзА