Тадбиркорликни қўллаб-қувватлаш ва унинг самарали ривожланишига кўмаклашиш мақсадида Халқ банки масъуллари жойларга чиқиб, тадбиркорлар билан очиқ мулоқотлар ўтказмоқда.
Жорий йилнинг 23–24 октябрь кунлари Халқ банки бошқарув раиси ўринбосари Гулзода Рашидова бошчилигидаги делегация Қибрай туманидаги “Байитқўрғон” ҳамда Сергели туманидаги “Фароғатли” маҳаллаларидаги кичик ва ўрта бизнес субъектлари фаолияти билан танишди.
Учрашувлар давомида тадбиркорларнинг 60 га яқин мурожаати кўриб чиқилди, шунингдек, 30 дан зиёд корхона ва фаолият юритувчи субъектларнинг иш жараёни ўрганилди.
Шу билан бирга, маҳаллий тадбиркорлар ҳамда тадбиркорликни бошлаш истагида бўлган фуқаролар иштирокида семинар ташкил этилди. Унда кичик бизнесни кенгайтириш, молиявий ресурслардан самарали фойдаланиш, кредит ва имтиёзли дастурлар бўйича амалий тавсиялар берилди.
Учрашув якунларида тадбиркорлик фаолиятини янада ривожлантириш, янги иш ўринлари яратиш ва маҳаллий ишлаб чиқаришни кенгайтириш бўйича келгуси вазифалар белгилаб олинди.
ЎзА