Нидерландиянинг Хогевен шаҳрида шахмат бўйича ўтказилган “Hoogeveen Open-2025” халқаро турнирида Ўзбекистон терма жамоаси аъзоси ғолибликни тантана қилди.

Дунёнинг 19 мамлакатидан 224 нафар шахматчи иштирок этган баҳслар сарҳисобига кўра, ҳамюртимиз Абдумалик Абдусалимов “Open” гуруҳида 9 имкониятдан 7,5 очко жамғариб, 1-ўринни эгаллаши ортидан рейтинг кўрсаткичига +18.5 балл қўшишга муваффақ бўлди.

Мазкур турнирда қатнашган яна бир маҳоратли шахматчимиз Ортиқ Ниғматов 6,5 очко билан 5-ўриндан жой эгаллади. У рейтинг кўрсаткичига +7.4 балл қўшишга эришди.

Мукофот жамғармаси 11 минг 600 еврода иборат турнирда 2-ўринни 7 очкога эга ҳиндистонлик Сандипан Чанда банд этган бўлса, 3-ўрин яна бир Ҳинд вакили Харикришнанга тегишли бўлди. У ҳамюртимиз Ниғматов сингари 6.5 очко жамғарган эди. Бироқ қўшимча кўрсаткичлар эвазига совринли ўринга кўтарилди.

Т.Рўзиев, ЎзА