Мамлакатимиз спортчиларининг ўтиб бораётган 2025 йил давомида халқаро спорт майдонларида эришаётган тарихий натижалари ҳақида сўз кетганда оғир атлетикачимиз Акбар Жўраевнинг Норвегияда яна бир бор жаҳон чемпионлигини қўлга киритиши билан дунё рекордини янгилаганлиги нафақат Ўзбек спортининг, балки жаҳон оғир атлетикасининг энг эсда қоладиган воқеаси сифатида ёд этилиши шубҳасиз.

Маҳоратли оғир атлетикачимиз жаҳон чемпионатининг 110 килограмм вазнида даст кўтаришда 196 кг тошни бўйсундириб, жаҳон рекордини ўрнатди. Силтаб кўтаришда 232 кг, икки кураш натижасига кўра, 428 кг кўрсаткич билан 3 та олтин медалга эга чиққан Акбар Жўраевнинг ютуқлари куни кеча муносиб эътироф этилди.

[gallery-25936]

Ўзбекистон Миллий олимпия қўмитасида оғир атлетика бўйича Норвегияда ўтказилган жаҳон чемпионатида 3 та олтин медални қўлга киритиб, -110 кг вазн тоифасида мутлақ чемпионликка эришган Акбар Жўраевга Ўзбекистон Республикаси Президенти совғаси – BYD автомобили ҳамда бир марталик пул мукофоти тантанали равишда топширилди.

Шунингдек, мазкур йўналишда 2 та бронза медалига сазовор бўлган оғир атлетикачимиз Руслан Нуруддинов ва уларнинг мураббийлари пул мукофотлари билан тақдирланди.

Т. Рўзиев, А. Мамадаминов(фото), ЎзА