Бугун, 24 октябрь куни Қарши шаҳридаги "Геолог" спорт мажмуасида футзал бўйича Ўзбекистон чемпионати Олий лига баҳслари 4-тур ўйинларининг учминчи кунги баҳслари бўлиб ўтади.

Тошкентнинг "Бунёдкор" жамоаси Бухоронинг "Oil Star" жамоаси билан куч синашса, мухлислар иккинчи ўйинда ОКМК – “BMB PFC" жамоаларининг қизиқарли ўйинига гувоҳ бўлади. "Қизилқум"-"Сурхон" учрашуви билан учинчи кунги баҳсларга якун ясалади.

Бир кун муқаддам 4-турнинг биринчи кунги ўйинларида Бухоронинг "Oil Star" жамоаси Тошкент вилоятининг "Максам-Чирчиқ" жамоасини 7:1 ҳисобида мағлуб этди.

"Локомотив" – "BMB PFC" ўртасидаги ўйинда Жиззах жамоаси катта имтиҳондан ўтди. Муросасиз кечган учрашувда темирйўлчилар 3:6 ҳисобида енгилган бўлса, “BMB PFC" жамоаси чемпионатдаги мағлубиятсиз юришини давом эттиришга эришди.

4-турнинг илк кунидаги сўнгги ўйинида SQB жамоаси футзалчилари "Динамо" дарвозасига жавобсиз олтита туп киритиб(6:0), совринли ўринларга даъвогарлигини намойиш этди.

Кеча 4-турнинг иккинчи кунги баҳсларида "Сурхон" "Нефтчи" билан, ОКМК – "Локомотив" билан дурангга имзо чекди. Ҳар икки учрашувда 2:2 ҳисоби қайд этилди.

Кунинг сўнгги ўйинида мухлислар SQB-"Насаф" қарама-қаршилигидаги чиройли ва қизиқарли баҳсда қаршилик футзал мухлислари голлар гулдастасига гувоҳ бўлишни ният қилишганди. Бироқ, маҳорат бобида “Насаф”дан устунликка эга SQB жамоаси ғолиб чиқиши ҳам мукин эди. Лекин қаршиликларнинг метин ҳимояси учрашувни 1:1 кўринишида якунланишини таъминлади.

Ортда қолган икки кунлик ўйинлар сарҳисобига кўра, турнир жадвалини 28 очко билан Жиззахнинг "BMB PFC" жамоаси боқариб турибди. Кейинги ўринлардан жой олган ОКМК ҳисобида 25, "Oil Star" ва SQB жамоаларида 23 тадан очко мавжуд.

Бугун "Бунёдкор"-"Oil Star" ва ОКМК – “BMB PFC" қарама-қаршилигидаги ўйинлар турнир жадвалида етакчиликка айнан қайси жамоалар муносиблигига ойдинлик киритадики, айнан 4-турнинг учинчи кунги тўқнашувлари кўп саволларга ойдинлик киритиши билан эътиборли саналади.

Олий лига 4-тур ўйинлари 25 октябрга қадар давом этади.

Т. Рўзиев, ЎзА