Наманган вилоятнинг Учқўрғон туманидаги “Картадром” мажмуасида Ўзбекистон мудофаасига кўмаклашувчи “Ватанпарвар” ташкилоти марказий кенгаши томонидан тасдиқланган йиллик тақвим режасига мувофиқ, спортнинг картинг тури бўйича Ўзбекистон очиқ кубогининг финал босқичи ўтказилди.

Мамлакатимизда спортнинг техник ва амалий турларини ривожлантириш, жисмоний тарбия ва спортни кенг оммалаштириш, ёшларни ватанпарварлик ва соғлом турмуш тарзи руҳида камол топтиришга қаратилган мазкур мусобақада Хоразм, Бухоро, Сирдарё, Наманган, Тошкент вилоятлари ва Тошкент шаҳри ҳамда Россия Федерация, Тожикистондан келган юзга яқин спортчилар ғолиблик учун баҳслашдилар.

Мусобақа иштирокчилари  “Микро”, “Мини”, “Супер-мини”, “Ок-жуниор”, “Патриот”, “КФ”, “КЗ” синфлари бўйича беллашди. Халқаро даража касб этган турнирнинг якуний натижаларига кўра, барча йўналишда энг юқори натижаларга эришган Наманган вилояти терма жамоаси спортчилари умумжамоа ҳисобида фахрли биринчи ўринни эгаллаб, кубокни қўлга киритди. Фахрли иккинчи ўринга пойтахтимиз спортчилари муносиб кўрилди. Шоҳсупанинг кучли учлигини Тошкент вилояти жамоаси якунлаб берди.

Мусобақанинг тантанали тақдирлаш маросимида “Ватанпарвар” ташкилоти марказий кенгаши раисининг ўринбосари - республика техник ва амалий спорт турлари маркази бош директори Анвар Қурбаниязов, ташкилотнинг вилоят кенгаши раиси Аҳмаджон Аълохўжаев ғолибларга кубок, диплом ва қимматбаҳо совғаларни топширдилар.

Оқилхон Дадабоев, ЎзА.