18 октябрь куни U-ENTER коворкинг-марказида UZCARD Academyнинг “Welcome Day” тадбири бўлиб ўтди — бу UZCARD тўлов тизими томонидан молиявий технологиялар ва бизнес йўналишида ёш мутахассисларни тайёрлаш учун яратилган янги таълим платформасининг очиқ эшиклар куни ҳисобланади.

Тадбир мамлакатнинг етакчи олийгоҳлари талабалари, UZCARD вакиллари ва таълим ҳамда ривожланиш бўйича UZCARD Academy ҳамкори бўлган Lerna компанияси вакилларини бирлаштирди. Тадбир доирасида UZCARD ва Lerna ўртасида ҳамкорлик меморандуми имзоланди. Мазкур ҳужжат рақамли таълимни ривожлантириш ва финтех соҳаси учун кадрлар тайёрлаш борасидаги стратегик ҳамкорликни мустаҳкамлади. 

“UZCARD Academy билан ҳамкорлик — технологик компания тажрибаси ва янги авлод таълим ёндашувларини уйғунлаштириш имконияти. Биз талабаларни назариядан амалиётга тез ўтишга ва бозор талаб қиладиган компетенцияларни ривожлантиришга ёрдам берадиган дастурлар яратишга интиламиз,” — деди Эмиль Тимошев, Lerna Uzbekistan бош директори.

“Ёшларнинг онгли равишда касб танлашига ва финтех соҳасида ўз ўрнини топишига кўмаклашиш биз учун муҳим. UZCARD Academy уларга фақат университетда олишнинг иложи бўлмаган тажрибани беради ва келажак касбининг реал томонини кўрсатади,” — дея таъкидлади Юлия Цапкова, “UCMG” МЧЖ бошқарув компаниясининг HR бўйича бош директор ўринбосари.

UZCARD Academy дастурлари UZCARD ва Lerna экспертлари билан ҳамкорликда ишлаб чиқилган бўлиб, икки асосий йўналишни қамраб олади — “Технология ва маҳсулот” ҳамда “Бизнес ва қўллаб-қувватлаш”.

Техник блокда тингловчилар маҳсулот ва лойиҳа ишларининг асослари, тизимли таҳлил, шунингдек замонавий IT йўналишлари: Front-End ва Back-End  дастурлаш, Data-таҳлил, DevOps, тестлаш (ҚА), ахборот хавфсизлиги ва инфратузилмани қўллаб-қувватлаш билан танишадилар.

Бизнес йўналишида маркетинг (жумладан, рақамли ва PR), лойиҳа ва маҳсулот бошқаруви, риск таҳлили, комплаенс, молия ва HR амалиётлари ўрганилади. Алоҳида эътибор технология ва бизнес жамоалари ўртасидаги самарали мулоқотга қаратилади, бу эса талабалар ҳақиқий финтех маҳсулотлари қандай яратилиши ва ривожланишини кўришларига ёрдам беради.

Ўқитиш тузилмаси 2 ой назария ва 3 ой амалиётдан иборат бўлиб, амалиёт УCМГ экотизими шароитида ўтказилади. Энг яхши битирувчилар ҳолдинг таркибидаги 12 та компаниядан бирида стажировка ва ишга жойлашиш имкониятига эга бўладилар.

UZCARD Academyда таълим бепул бўлиб, 25 ёшгача бўлган талабаларга очиқ. Формат — онлайн ва офлайн; қабул тест синови орқали амалга оширилади. Академия йил давомида ишлайди ва қабул доимий.

Welcome Day доирасида иштирокчилар дастлабки сараловдан ҳам ўтишди: тест ва суҳбат натижаларига кўра энг яхши номзодлар Академияга таклиф этилади. Қолганлар учун лойиҳа эшиклари очиқ — навбатдаги қабул январь ойида бошланади.

UZCARD Academy лойиҳаси талаба, бизнес ва технологиялар манфаатлари кесишадиган барқарор таълим тизимини шакллантирмоқда. Бу — Ўзбекистон рақамли иқтисодиёти учун кадрларни тизимли тайёрлаш сари қадам ва ўқишга, ҳаракат қилишга ҳамда ҳақиқатни ўзгартиришга тайёр бўлганлар яратадиган келажак сари йўл.

Алоқа учун: academy@uzcard.uz

Сайт: uzcard.uz
Facebook: fb.com/uzcard
Instagram: @uzcard.uz
Telegram: t.me/uzcard