Time журнали мутахассислари чорак асрдан буён ҳар йили “Time’s Best Inventions” — энг яхши ихтиролар рейтингини эълон қилиб келади. 2025 йилда ҳам нашр инсоният сўнгги бир йил давомида яратган 300 та энг муҳим ва инновацион кашфиётларни санаб ўтди.
Энг яхши ихтиролар “Робототехника”, “Гўзаллик”, “Кўнгилочар”, “Саломатлик”, “Дизайн”, “Қишлоқ хўжалиги”, “Озиқ-овқат”, “Сунъий интеллект” каби тоифаларга бўлинди. Баҳолашда ихтироларнинг самарадорлиги, технологик салоҳияти ва инсон ҳаётига таъсири мезон сифатида олинган.
2025 йилги рейтингда бир қатор ноодатий ва илғор технологиялар эътиборни тортди. Масалан, Lenovo ThinkBook Transparent Display
— шаффоф экранли ноутбук рассомлар ва дизайнерлар учун мўлжалланган бўлиб, у 17,3 дюймли MicroLED дисплей ва сенсорли клавиатура билан жиҳозланган.
Tecno Pocket Go — аралаш реаллик (АR) ўйин қурилмаси бўлиб, фойдаланувчи Windows ўйинларини “ҳавода сузиб юрувчи” ойна шаклида ўйнаши мумкин.
Huawei Mate XT Ultimate Design эса уч марта букланадиган илк смартфон бўлиб, 10,2 дюймли экран ва атиги 3,6 миллиметр қалинликка эга.
Соғлиқни сақлаш тоифасида AstraZeneca FluMist эътиборга сазовор бўлди — бу дунёдаги биринчи бурун орқали ишлатиладиган шприц бўлиб, уй шароитида грипп ёки CОVID-19 вакцинасини пуркаш йўли билан юбориш имконини беради.
Apple AirPods Pro 2 қулоқчинлари ҳам рўйхатга киритилган — улар эшитиш аппарати режимига эга бўлган биринчи модель ҳисобланади.
Cloudboom Strike LS — атиги 170 грамм оғирликдаги энг енгил поябзаллардан бири сифатида эътироф этилди, ShedRain The Duo Umbrella эса икки киши учун мўлжалланган ноёб соябон сифатида тан олинди.
Гўзаллик соҳасида Luum Precision Lash — киприк уловчи робот, Aescape — шахсга мосланувчи профессионал робот-массажчи энг диққатга сазовор янгиликлар қаторида қайд этилди.
Шунингдек, Asus Zenbook Duo икки экранли ноутбуки ва Kangsters Wheely-X — ногиронлар аравачаси фойдаланувчилари учун мўлжалланган югуриш йўлкаси ҳам йилнинг энг инновацион ихтиролари сифатида эътироф этилган.
Time журнали таъкидлаганидек, бу ихтиролар инсон ҳаётини янада қулай, хавфсиз ва ижод қилишга хизмат қилмоқда ҳамда технологик тараққиётнинг янги босқичини бошлаб бермоқда.
<iframe width="640" height="420" src="https://www.youtube.com/embed/awJc0p0-Tmo" title="Tame jurnali 2025 yilning eng yaxshi ixtirolarini e’lon qildi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Мадинабону Насриева,
Анвархўжа Аҳмедов, ЎзА