Женевада Парламентлараро Иттифоқнинг 151-ассамблеяси бўлиб ўтмоқда. Унда Ўзбекистон Сенати Раиси Танзила Норбоева иштирок этмоқда.

– Ассамблея доирасида парламент аёл аъзолари форумида иштирок этдик, – деди Т.Норбоева. – “Бирдамлик ва илҳом: аёлларни ўз йўлида қўллаб-қувватлаш” мавзусида глобал аҳамиятга молик масалалар муҳокама этилди. Барча иштирокчилар Тошкентда йил бошида бўлиб ўтган Парламентлараро Иттифоқнинг 150-юбилей ассамблеясининг юксак даражада ташкил этилганини алоҳида қайд этиб, мазкур анжуман доирасида ўтказилган хотин-қизлар форумининг ўзига хос ўрни ва қабул қилинган Тошкент декларациясининг тарихий аҳамиятини эътироф этди.

Форумда ҳар бир аёлнинг овози, унинг орзуси ва глобал ҳамжамиятнинг бирдамлик руҳи ҳақида фикр юритилди. Шу маънода, Ўзбекистонда хотин-қизларнинг салоҳиятини рўёбга чиқаришга қаратилган комплекс ёндашувни илгари суриб, парламентлараро ҳамкорликни кучайтириш, билим ва етакчилик имкониятларини кенгайтириш ҳамда инқироз шароитида қолган аёлларга амалий ёрдам кўрсатишни ўз ичига олган ташаббуслар тақдим этилди. 

Аёлларни қўллаб-қувватлаш ва уларнинг жамиятдаги ўрнини мустаҳкамлаш – бу фақат миллий манфаат эмас, балки инсониятнинг умумий тараққиёти ва тинчликка эришиш йўлидаги стратегик вазифа.

Н.Абдураимова,

ЎзА