Баҳрайннинг Манама шаҳрида ёшлар ўртасидаги III Осиё ўйинларининг илк кунги беллашувлари спортчиларимиз учун муваффақиятли ўтди.

Аниқроқ айтадиган бўлсак, кураш бўйича Отабек Йўлдошбоев ва Дурдона Турсунова ўз вазн тоифаларида олтин медални қўлга киритган бўлса, пенчак силат баҳсларида Феруза Бозорова ҳамда Нурислом Рўзибоев ярим финалга чиқди.

Илк кунги беллашувлар якунида Ўзбекистон делегацияси 2 та олтин медаль билан умумжамоа ҳисобида биринчи ўринга чиқиб олди. Эронлик спортчилар биттадан кумуш ва бронза медалига эга бўлган ҳолда иккинчи, Қирғизистон эса ягона кумуш медалини қўлга киритиб, кучли учликдан жой олди.

Бугун, 20 октябрь куни Ўзбекистон делегацияси аъзолари волейбол, гандбол, кураш ва пенчак силат спорт турлари бўйича баҳсларга киришади.

Жумладан, волейбол бўйича Ўзбекистон терма жамоаси Қозоғистон термасини синовдан ўтказса, гандболчи қизларимиз илк босқичда ҳиндистонлик рақибларига қарши рақобатлашади.

Кураш беллашувларида Шоҳжаҳон Ғолибов ўз иштирокини тўғридан-тўғри ярим финал босқичидан бошлайди. Мубинабону Каримова эса филиппинлик Хиан Алкала билан чорак финалда баҳс олиб боради. Пенчак силат спорт турининг ярим финалида Феруза Бозорова индонезиялик Тата Олифиа, Нурислом Рўзибоев эса малайзиялик Муҳаммад Рақибга қарши финал йўлланмаси учун жанг қилади.

Жавоҳир Тошхўжаев,

ЎзА