Олий Мажлис Қонунчилик палатасининг навбатдаги мажлиси бўлиб ўтмоқда. Унда бир қатор қонун лойиҳаларини муҳокама қилиш кўзда тутилган.

Мажлисда бир гуруҳ депутатлар томонидан қонунчилик ташаббуси ҳуқуқи асосида ишлаб чиқилган хусусий мулк ҳуқуқи кафолатларини янада кучайтириш, қишлоқ хўжалигига мўлжалланган ер участкаларидан самарали фойдаланишга қаратилган қонун лойиҳаси иккинчи ўқишда кўриб чиқилди.  

Мамлакатимизда мулкдорлар ҳуқуқларининг кафолатларини кучайтиришга, қишлоқ хўжалиги маҳсулотлари етиштирувчиларнинг фаолиятини қўллаб-қувватлашга қаратилган изчил ислоҳотлар амалга оширилмоқда, — деди депутат М.Аҳмедова. — Шу билан бирга, хусусий мулк ҳуқуқининг ҳар қандай бузилиши учун жавобгарликни таъминлаш, ижарага олинган қишлоқ хўжалигига мўлжалланган ер участкаларининг бир қисмига бўлган ҳуқуқ ва мажбуриятларни бошқа шахсга ўтказиш — қайта ижарага беришнинг ҳуқуқий асосларини белгилаш зарурияти юзага келмоқда. Шундан келиб чиқиб, депутатларнинг сайловчилар билан учрашувларида кўтарилган таклифлари асосида қишлоқ хўжалигига мўлжалланган ер участкасининг ижарачиси ўзига ижарага берилган ер участкаларидан бири ёки бир нечтаси бўйича ўз ҳуқуқлари ва мажбуриятларини бошқа шахсга ўтказиш (қайта ижарага бериши) мумкинлиги нормаси акс эттириляпти. Шунингдек, лойиҳада айрим қонун ҳужжатларига товарларнинг, хизматларнинг ва молиявий маблағларнинг эркин ҳаракатланишига ёки товарларнинг реализация қилинишига қонунга хилоф равишда аралашганлик ёхуд тўсқинлик қилганлик учун жавобгарлик белгиланмоқда.  

Қайд этилганидек, қонун лойиҳасининг қабул қилиниши мамлакатимизда хусусий мулк ҳуқуқи кафолатларини янада кучайтириш, ердан фойдаланувчиларнинг кафолатланган ҳуқуқлари таъминланишига ҳамда қишлоқ хўжалигига мўлжалланган ер участкаларидан самарали фойдаланиш имконини оширишга хизмат қилади.  

Моддама-модда муҳокамалардан сўнг қонун лойиҳаси иккинчи ўқишда қабул қилинди.  

Муҳтарама Комилова, ЎзА