Япониянинг “Nikkei Asia” нашри маълум қилишича, мазкур мамлакатнинг “Sojitz” корпорацияси Тошкент шаҳрида қуриладиган янги халқаро аэропорт лойиҳасига 1 миллиард долларлик инвестиция йўналтиради.

Лойиҳа Саудия Арабистонининг “Vision Invest” компанияси билан давлат-хусусий шериклик асосида амалга оширилади. Янги аэропорт 2028 йилда фойдаланишга топширилиши режалаштирилган, йилига 20 миллион йўловчини қабул қилиш ҳамда соатига 40 дан зиёд парвозни амалга ошириш имкониятига эга бўлади. Бу Марказий Осиёнинг энг йирик аэропортига айланиши кутилмоқда.

“Sojitz” корпорацияси мазкур лойиҳани компаниянинг глобал инфратузилма сармоялари доирасида амалга оширмоқда. Компания аввал Япониянинг Кумамото, Окинава ҳамда Палау оролларидаги аэропорт лойиҳаларида ҳам иштирок этган.

Шунингдек, “Sojitz” томонидан Ўзбекистонда бошқа йирик инфратузилма лойиҳалари — Самарқандда Туркиянинг “Ronesans International” компанияси билан 800 ўринли касалхона, 1 ГВт шамол электр станцияси ҳамда 1,6 ГВт иссиқлик электростанцияси қуриш режалаштирилган.

Ўзбекистон 37 миллиондан зиёд аҳолига эга, иқтисодиёт йиллик 6 фоиздан ортиқ ўсиш суръатини намоён этмоқда. Чет эл сармоядорлари учун солиқ имтиёзлари ва рағбатлар жорий этилган, корпоратив солиқ ставкаси эса 15 фоизни ташкил этади, дея қайд этилган хабарда.

Эслатиб ўтамиз, 2024 йил октябрь ҳолатига кўра, Ўзбекистонда Япониянинг 54 та компанияси фаолият юритмоқда. Бу 2019 йилга нисбатан икки баравар кўп. “Sojitz” корпорацияси ҳам июнь ойида Тошкентда ўзининг илк расмий офисини очган эди.

Б.Худойбердиев,

ЎзА