Yaponiya – bu nafaqat ilg‘or texnologiyalar, zamonaviy shaharlar va boy madaniy meros bilan mashhur mamlakat, balki dunyoda eng uzoq umr ko‘ruvchi aholiga ega, o‘ziga xos an’analar va zamonaviylik uyg‘unlashgan joy sifatida ham tanilgan. Yaponiyaning poytaxti Tokio dunyoning eng yirik shaharlaridan biri bo‘lib, har yili millionlab sayyohlarni o‘ziga jalb qiladi.
Bu mamlakat mehnatsevarlik, intizom, samaradorlik va yuqori sifatli ta’lim tizimi bilan ham dunyo miqyosida tanilgan. Shuningdek, Yaponiya turizm va ishbilarmonlik uchun juda ko‘p imkoniyatlar yaratadi, shuning uchun ham butun dunyoda, shu jumladan O‘zbekiston fuqarolarida ham katta qiziqish uyg‘otmoqda.
Milliy statistika qo‘mitasi ma’lumotlariga ko‘ra, 2025 yilning yanvar-iyul oylarida Yaponiyaga turistik maqsadlarda borgan o‘zbekistonliklar soni sezilarli darajada oshdi. Jami 1,7 ming nafar o‘zbekistonlik Yaponiyaga safar qilgan, bu o‘tgan yilning mos davriga nisbatan 1,6 barobar ko‘p degani.
O‘sish sur’atlari diqqatga sazovor, chunki 2024 yilning birinchi yetti oyida bu ko‘rsatkich faqat 663 nafarga oshgan. Bu esa o‘z navbatida, Yaponiyaga bo‘lgan talab va qiziqish oshayotganidan dalolat beradi.
Quyida Yaponiyaga safar maqsadlarini ko‘rishimiz mumkin: sayohat – 1 407 nafar, qarindoshlarni yo‘qlash – 196 nafar, o‘qish – 103 nafar, xizmat yuzasidan – 28 nafar va davolanish maqsadida – 4 nafarni tashkil qiladi.
Ushbu ma’lumotlardan ko‘rinib turibdiki, asosiy massa sayohat maqsadida Yaponiyaga borgan. Bu esa mamlakatning tabiiy go‘zalliklari, qadimiy tarixiy joylari va rivojlangan turizm infratuzilmasiga qiziqishning oshgani haqida dalolat beradi. Shuningdek, qarindoshlarni yo‘qlash va ta’lim olish maqsadida safar qiluvchilar sonining ortishi ijtimoiy va madaniy aloqalarning mustahkamlanishiga ham ishora qiladi.
Yaponiyaga o‘zbekistonliklarning sayohati oshishi mamlakatlar o‘rtasidagi madaniy va iqtisodiy aloqalarni yanada mustahkamlaydi. Bu jarayon ikki tomon uchun ham yangi imkoniyatlar eshigini ochadi, o‘zbekistonliklar uchun ta’lim va ish imkoniyatlari kengayadi. Yaponiya esa o‘z madaniyati va iqtisodiyotini yangi bozorlar orqali yanada rivojlantiradi. Shuningdek, mamlakat ichidagi turizm sohasining rivojlanishi uchun ham yangi yo‘nalishlar ochilishi mumkin. O‘zbekistonlik turistlarning Yaponiyaga bo‘lgan qiziqishi yanada oshishi kutilyapti, bu esa ikki tomonlama aloqalarning yanada chuqurlashishiga zamin yaratadi.
2025 yilning birinchi yetti oyida Yaponiyaga safar qilgan O‘zbekistonliklar sonining 1,6 barobarga oshishi mamlakatlar o‘rtasidagi munosabatlarning yangi darajasini ko‘rsatmoqda. Bu o‘sish turizm, ta’lim, madaniyat va iqtisodiyot sohalarida yangi imkoniyatlar yaratmoqda. Shu bilan birga, kelajakda bu yo‘nalishdagi hamkorlik yanada kuchayishi kutilmoqda, chunki Yaponiyaning takomillashgan infratuzilmasi va o‘zbekistonliklar orasida oshib borayotgan qiziqish bu jarayonni faollashtirmoqda.
Dildora DO‘SMATOVA,
O‘zA