Япония – бу нафақат илғор технологиялар, замонавий шаҳарлар ва бой маданий мерос билан машҳур мамлакат, балки дунёда энг узоқ умр кўрувчи аҳолига эга, ўзига хос анъаналар ва замонавийлик уйғунлашган жой сифатида ҳам танилган. Япониянинг пойтахти Токио дунёнинг энг йирик шаҳарларидан бири бўлиб, ҳар йили миллионлаб сайёҳларни ўзига жалб қилади.
Бу мамлакат меҳнатсеварлик, интизом, самарадорлик ва юқори сифатли таълим тизими билан ҳам дунё миқёсида танилган. Шунингдек, Япония туризм ва ишбилармонлик учун жуда кўп имкониятлар яратади, шунинг учун ҳам бутун дунёда, шу жумладан Ўзбекистон фуқароларида ҳам катта қизиқиш уйғотмоқда.
Миллий статистика қўмитаси маълумотларига кўра, 2025 йилнинг январь-июль ойларида Японияга туристик мақсадларда борган ўзбекистонликлар сони сезиларли даражада ошди. Жами 1,7 минг нафар ўзбекистонлик Японияга сафар қилган, бу ўтган йилнинг мос даврига нисбатан 1,6 баробар кўп дегани.
Ўсиш суръатлари диққатга сазовор, чунки 2024 йилнинг биринчи етти ойида бу кўрсаткич фақат 663 нафарга ошган. Бу эса ўз навбатида, Японияга бўлган талаб ва қизиқиш ошаётганидан далолат беради.
Қуйида Японияга сафар мақсадларини кўришимиз мумкин: саёҳат – 1 407 нафар, қариндошларни йўқлаш – 196 нафар, ўқиш – 103 нафар, хизмат юзасидан – 28 нафар ва даволаниш мақсадида – 4 нафарни ташкил қилади.
Ушбу маълумотлардан кўриниб турибдики, асосий масса саёҳат мақсадида Японияга борган. Бу эса мамлакатнинг табиий гўзалликлари, қадимий тарихий жойлари ва ривожланган туризм инфратузилмасига қизиқишнинг ошгани ҳақида далолат беради. Шунингдек, қариндошларни йўқлаш ва таълим олиш мақсадида сафар қилувчилар сонининг ортиши ижтимоий ва маданий алоқаларнинг мустаҳкамланишига ҳам ишора қилади.
Японияга ўзбекистонликларнинг саёҳати ошиши мамлакатлар ўртасидаги маданий ва иқтисодий алоқаларни янада мустаҳкамлайди. Бу жараён икки томон учун ҳам янги имкониятлар эшигини очади, ўзбекистонликлар учун таълим ва иш имкониятлари кенгаяди. Япония эса ўз маданияти ва иқтисодиётини янги бозорлар орқали янада ривожлантиради. Шунингдек, мамлакат ичидаги туризм соҳасининг ривожланиши учун ҳам янги йўналишлар очилиши мумкин. Ўзбекистонлик туристларнинг Японияга бўлган қизиқиши янада ошиши кутиляпти, бу эса икки томонлама алоқаларнинг янада чуқурлашишига замин яратади.
2025 йилнинг биринчи етти ойида Японияга сафар қилган Ўзбекистонликлар сонининг 1,6 баробарга ошиши мамлакатлар ўртасидаги муносабатларнинг янги даражасини кўрсатмоқда. Бу ўсиш туризм, таълим, маданият ва иқтисодиёт соҳаларида янги имкониятлар яратмоқда. Шу билан бирга, келажакда бу йўналишдаги ҳамкорлик янада кучайиши кутилмоқда, чунки Япониянинг такомиллашган инфратузилмаси ва ўзбекистонликлар орасида ошиб бораётган қизиқиш бу жараённи фаоллаштирмоқда.
Дилдора ДЎСМАТОВА,
ЎзА