Қозоғистон Республикасининг Остона шаҳрида спортнинг қўл жанги тури бўйича жаҳон кубоги мусобақаси ўтказилди.

Мазкур нуфузли мусобақада дунёнинг турли бурчакларидан ташриф буюрган 400 га яқин маҳоратли спортчилар “Ўзини ҳимоя қилиш” ва “Жанг” йўналишларида ғолиблик учун шиддатли ва муросасиз баҳс олиб бордилар.

Қўл жанги – бу фақат жисмоний куч эмас, балки ирода ва интизомни талаб қилувчи спорт тури. Ана шундай синовли майдонда терма жамоамиз ўз сўзини айтди. Спортчиларимиз жонкуяр мураббийлари раҳбарлигида мусобақада муносиб иштирок этиб, умумжамоа ҳисобида фахрли 1-ўринни эгаллади.

Улар 8 та олтин, 9 та кумуш ва 10 та бронза медалини қўлга киритди ва мусобақанинг мутлақ ғолибига айланди. Шунингдек, 6 та олтин, 5 та кумуш ва 14 та бронза медали билан Қозоғистон терма жамоаси 2-ўринни, 1 та олтин билан эса Тожикистон термаси 3-ўринни эгаллади.

Юртимиз шарафини муносиб ҳимоя қилган миллий терма жамоамиз спортчи ва мураббийлари Тошкент халқаро аэропортида ҳарбий оркестр садолари остида тантанали кутиб олинди.

Ўзбекистон спорти яна бир бор дунёга ўз салоҳиятини намойиш этди. Бу ютуқ нафақат ғалаба, балки юртимизда спортга бўлган эътибор, ватанпарварлик руҳи ва жисмоний тарбиянинг юксак даражаси эканини тасдиқлайди.

<iframe width="640" height="480" src="https://www.youtube.com/embed/d8QInEnML3Q?si=4glh41i0Wb4yo6Bs" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Н.Раҳмонова,

А.Аҳмедов (монтаж)

ЎзА