Пойтахтимиздаги Гимнастика бўйича ихтисослаштирилган республика болалар-ўсмирлар олимпия захираси спорт мактабида кикбоксинг бўйича жаҳон кубоги баҳслари қизғин паллага кирди.

Бутунжаҳон кикбоксинг ташкилотлари ассоциацияси (WAKO), Ўзбекистон спорт вазирлиги, мамлакатимиз кикбоксинг ассоциацияси томонидан қатор вазирлик ва ташкилотлар билан ҳамкорликда ўтказилаётган ушбу нуфузли мусобақада спортчилар кикбоксингнинг турли йўналишларида медаллар учун рақобатлашмоқда.

Кубок баҳсларининг бугунга қадар ўтган беллашувларида Ўзбекистон терма жамоаси аъзолари 81 та олтин, 79 та кумуш ва 258 та бронза медалини қўлга киритган ҳолда умумжамоа ҳисобида карвонбошилик қилмоқда. Тожикистонлик кикбоксингчилар 20 та олтин, 15 та кумуш ва 27 та бронза жамғариб, иккинчи, 9 та олтин, 11 та кумуш ҳамда 37 та бронзага эга бўлган Қозоғистон терма жамоаси учинчи поғонадан жой олган.  

Жаҳон кубогида бугун, 11 октябрь куни профессионал кикбоксингчилар иштирокида “Gala Final” беллашувлари ўтказилади. Унда 15 ta жанг “K1”, “Low Kick”, “Full Contact”, “Point Fighting” йўналишларида ташкил этилади.

Жавоҳир Тошхўжаев,

ЎзА