Ўзбекистонда олтин нархлари яна рекорд кўрсаткични қайд этди. Марказий банк маълумотига кўра, 9 октябрь ҳолатида 1 грамм олтин 1 миллион 608 минг 600 сўмдан баҳоланмоқда. Бу — бир кунда 24 минг сўмдан ортиқ ўсиш демакдир.

Таққослаш учун, йил бошида ушбу қимматбаҳо металлнинг 1 грами 1 миллион 132 минг 200 сўмдан сотилган эди. Натижада, 5 граммлик олтин қуймаси нархи илк бор 8 миллион сўмлик чегарадан ошиб, 8 миллион 43 минг сўмга етди. Шунингдек, 50 граммлик қуйма — 80 миллион 425 минг сўм, 100 граммлик қуйма эса — 160 миллион 851 минг сўмдан баҳоланмоқда.

Жаҳон бозорида ҳам олтин нархи юқори суръатда ўсмоқда: тройск унцияси 4037,15 долларга, яъни 1 грами тахминан 129,73 долларга тенг.

Марказий банк 2020 йилдан буён аҳолига 999,9 намунадаги тоза олтиндан тайёрланган қуймаларни таклиф қилиб келмоқда. Ҳозирда 5, 10, 20, 50 ва 100 грамм оғирликдаги қуймалар сотувда мавжуд.

Маълумот ўрнида айтиш жоиз, олтин қуймаларнинг ҳар кунги нархлари Марказий банкнинг расмий веб-сайтида миллий валютада эълон қилинади.

Шаҳноза Маматуропова,

ЎзА