ATTO компанияси фуқаролар карталаридан маблағ ечиб олиш ҳолатлари бўйича изоҳ берди
Ижтимоий тармоқларда фуқароларнинг карталаридан метро учун маблағ ечиб олинаётгани ҳақида хабарлар тарқалди. Мазкур ҳолат бўйича компания расмий муносабат билдирди.
Расмий баёнотда қайд этилишича, Тошкент метрополитенининг «Буюк Ипак йўли» бекатидаги 1 вестибюлда ўрнатилган тўлов қурилмалари орқали 16-30 сентябрь оралиғида ўтказилган тўловлар техник сабабларга кўра ўз вақтида қайта ишланмагани туфайли ҳозирги кунда карталардан ушбу вақт оралиғидаги тўловлар карталар ҳисобидан ечиб олиниш жараёни кетмоқда.
Шунингдек, баёнотда бунда ҳеч қандай ортиқча ёки нотўғри ечимлар амалга оширилмаётгани, маблағлар фақат белгиланган даврда йўловчилар томонидан амалга оширилган ҳақиқий сафарлар учун ушлаб қолинаётгани қайд этилган.
Ш.Маматуропова, ЎзА