Испания пойтахти Мадрид шаҳри марказида қайта тикланаётган олти қаватли бинo қулаб тушди. Натижада тўрт киши ҳалок бўлди, уч нафар одам яраланди. Бир ишчининг оёғи синган, бошқалар енгил жароҳат олган.

Ҳодиса кеча туш пайти, Пласа-Майор майдони яқинида содир бўлган. Гувоҳлар худди портлашга ўхшаш кучли овоз эшитилгани, кейин қалин тўзон ҳосил бўлганини айтган.

Қутқарувчилар вайрона остидан аввал икки қурбонни, кейин учинчи ва тўртинчи жасадни чиқариб олган – бир аёл, уч эркак. Улар маҳаллий ANKA қурилиш компаниясида расман ишлаётган Мали, Гвинея ва Эквадор фуқаролари эди.

Мадрид шаҳри ҳокими Хосе Луис Мартинес-Альмейда билдиришича, олтинчи қават шифти қулаган ва иншоотнинг бир қисми чўккан. Шунингдек, мулозим қурилиш февралдан бери қонуний рухсат асосида олиб борилганини қўшимча қилган.

1965 йил қурилган бу бинo тўрт юлдузли меҳмонхонага айлантирилиши режалаштирилган эди. Ҳодиса сабаби аниқланяпти. Қидирув ишлари ҳали тўлиқ якунланмаган.

Д.Ҳакимов, ЎзА