Перу пойтахти Лима шаҳрида ёшлар ўртасида ўтказилган жаҳон чемпионатида Ўзбекистон терма жамоаси аъзолари 1 та кумуш ва 5 та бронза медалини қўлга киритди.

Жаҳон чемпионати яккалик баҳсларининг сўнгги кунида оғир вазн тоифаларида ғолиб ва совриндорлар номи аниқланди. Унда Умида Ниғматова (+78 кг) финалга қадар ўтган баҳсларда барча рақибларини таслим этиб, кумуш медалга эга чиқди.  

Вазни -100 кг. бўлган дзюдочимиз Муҳаммадали Зоиров бронза медали учун кечган беллашувда қозоғистонлик Асқар Биржановни соф иппон баҳоси билан мағлубиятга учратди. Алишер Саманов эса -90 кг вазнда бронза медали учун ўтган баҳсда молдовалик Вадим Гимбовчини таслим этди.  

Эслатиб ўтамиз, бугун, 8 октябрь куни жаҳон чемпионатининг аралаш жамоавий беллашувлари старт олади. Унда 12 та терма жамоа баҳсларга киришади.

Жавоҳир Тошхўжаев,

ЎзА