Озарбайжоннинг 7 та шаҳрида давом этаётган III МДҲ ўйинларининг ортда қолган еттинчи кунги баҳслари сарҳисобига кўра, иштирокчи давлатларнинг 7 таси совринли ўринларни қўлга киритган бўлса, 6 та миллий терма жамоалар биронта ҳам медални қўлга кирита олмади.

Етакчилик борасида россиялик спортчилар 96 (64-19-13) та медаллар жамланмаси билан карвонбошилик қилаётган вазиятда Озарбайжон вакиллари 62 та (8-21- 33) медаль билан иккинчи, Беларус спорт делегацияси 52 та (7-19-26) совринли ўрин билан учинчи ўринда бормоқда.

Ўзбекистон спортчилари 28 та (3-8-17) медаллар шодасини жамғарган ҳолатда кучли тўртликни банд этиб турибди.

Бугун мамлакатимиз спортчилари ўйинларнинг саккизинчи кунида 10 та спорт турида кечадиган баҳсларда қатнашмоқда.

Спортчиларимиз кун давомида футбол (Ўзбекистон-Қирғизистон), камондан отиш (1/8 финал), волейбол (сарлаш Ўзбекистон-Озарбайжон), бокс (ярим финал), трамполин (финал), бадминтон (1/8 финал), қиличбозлик (саралаш), каратэ (саралаш), эркин кураш(айланма тизим), аёллар кураши (айланма тизим) йўналишларида ўз омадларини синовдан ўтказади.

Куни кеча Ўзбекистон Республикаси Спорт вазири ўринбосари Ш. Маҳмудов еттинчи кун якунлари ва саккизинчи кун мусобақалари остонасида zoom платформаси орқали Баку ўйинларида иштирок этаётган спорт турлари бўйича федерациялар мутасаддилари ва мураббийлар билан мусобақалар жараёнларини таҳлил қилди.

Муҳокамалар жараёнида эришилган натижалар кўриб чиқилди. Олдинда турган баҳсларда спортчиларимиз томонидан эътибор қаратилиши лозим бўлган жиҳатлар бирма-бир таҳлил қилиниб, масъулларга тегишли тавсиялар берилди.

Эслатиб ўтамиз, III МДҲ ўйинлари 9 октябрга қадар давом этади.

Тўлқин Рўзиев, ЎзА