Президентимиз Шавкат Мирзиёевнинг Бирлашган Миллатлар Ташкилоти Бош Ассамблеясининг юбилей анжумани – 80-сессиясидаги нутқининг аҳамияти ҳақида Сенатнинг Мудофаа ва хавфсизлик масалалари қўмитаси раиси Қутбиддин Бурҳонов ўз фикрларини билдирди:

– Президентимиз Шавкат Мирзиёевнинг БМТ минбаридан сўзлаган нутқи нафақат Ўзбекистон, балки бутун минтақамиз учун катта аҳамиятга эга бўлди. Унда миллий манфаатлар билан бир қаторда, глобал ҳамжамиятни ташвишга солаётган масалалар — иқлим ўзгариши, барқарор ривожланиш, минтақавий хавфсизлик ва инсон ҳуқуқларига жиддий эътибор қаратилди.

Айниқса, Афғонистон масаласида амалий таклифлар билдирилиши, транспорт ва энергетика йўлаклари орқали Марказий ва Жанубий Осиёни бир-бирига яқинлаштириш ғояси халқаро ҳамкорлик учун янги имкониятлар эшигини очади. Бу ташаббус нафақат иқтисодий жиҳатдан, балки сиёсий барқарорлик ва хавфсизлик нуқтаи назаридан ҳам беқиёс аҳамиятга эга.

Оролбўйи муаммосининг яна бир бор халқаро ҳамжамият эътиборига олиб чиқилиши Ўзбекистоннинг экологик сиёсатда масъулиятли позицияга эгалигини кўрсатди. Бу мамлакатимизнинг глобал экологик ташаббусларда фаол иштирок этишини англатади.

Нутқдаги ҳар бир ташаббус Ўзбекистоннинг очиқлик сиёсатига, адолатли ва барқарор тараққиётга интилишига, халқаро ҳамкорликка тайёрлигини яққол намоён қилди. Фикримча, бу нутқ нафақат дипломатик жиҳатдан, балки Ўзбекистоннинг халқаро имижи, минтақавий нуфузи ва стратегик истиқболини белгилашда ҳам юксак аҳамият касб этди

Президент Шавкат Мирзиёевнинг БМТ минбаридан сўзлаган нутқи Ўзбекистоннинг халқаро майдондаги нуфузини янада мустаҳкамлади. Бу нутқни учта муҳим жиҳатдан ижобий баҳолаш мумкин.

Биринчи жиҳат – глобал масалаларга масъулият билан ёндашув. Нутқда иқлим ўзгариши, экологик хавфлар, барқарор ривожланиш ва инсон ҳуқуқлари каби жаҳон ҳамжамияти учун долзарб масалалар кўтарилди. Айниқса, Оролбўйи фожиасига халқаро ҳамжамият эътиборини яна бир бор жалб этилиши Ўзбекистоннинг экологик муаммоларга жиддий қараётганидан далолатдир.

Иккинчи жиҳат – минтақавий барқарорлик ва ҳамкорлик. Президент нутқида Афғонистон билан конструктив мулоқот ва ҳамкорлик масаласига алоҳида урғу берди. Афғонистон орқали транспорт ва энергетика йўлаклари яратиш ташаббуси нафақат Ўзбекистон, балки бутун Марказий ва Жанубий Осиё давлатлари учун катта иқтисодий ва сиёсий аҳамият касб этади. Бу ташаббус минтақа тараққиётида янги саҳифа очиши мумкин.

Учинчи жиҳат – Ўзбекистоннинг халқаро интеграцияга очиқлиги. Президент халқаро молия институтлари, Жаҳон савдо ташкилоти ва бошқа нуфузли тузилмалар билан ҳамкорликни кенгайтириш зарурлигини таъкидлади. Бу нутқ Ўзбекистоннинг иқтисодий ислоҳотлари глобал стандартларга мос йўналишда боришини намоён қилди.

Менимча, мазкур нутқ нафақат расмий дипломатик баёнот сифатида, балки Ўзбекистоннинг келажак ривожланиш стратегияси сифатида ҳам қаралиши мумкин. Унда илгари сурилган ташаббуслар амалий қадамларга айланса, мамлакатимиз минтақавий ва глобал миқёсда нуфузли ва ишончли шерик сифатида янада тан олинади.

Шу боисдан, Президент Мирзиёевнинг БМТдаги нутқини Ўзбекистоннинг халқаро имижини мустаҳкамлашда ва мамлакатимиз тараққиётининг янги босқичини белгилашда муҳим қадам сифатида юксак баҳоланмоқда. 

<iframe width="650" height="420" src="https://www.youtube.com/embed/taJxL-jLD54" title="BMT minbaridagi nutq O‘zbekistonning xalqaro maydondagi nufuzini yanada mustahkamladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Норгул Абдураимова, Ёқуб Мелибоев (видео), ЎзА