Турон ҳарб иши тарихининг илдизлари энг қадимги даврларга бориб тақалади ва уни ёритиш учун археология ашёлари, халқ оғзаки ижоди, элшунослик намуналари, туркий, суғд, хитой, араб, форс, сурёний, озарбайжон, арман, юнон, лотин, рус ва бошқа тилларда кўплаб ёзма манбаларни илмий муомалага киритиш керак бўлади.

Ўзбек давлатчилигида муҳим ўрин тутиб келган ҳарб иш тарихини чуқур ва манбалар асосида ўрганиш масаласи сўнгги йилларда устувор вазифага айланди. Бунда ҳарбий қўмондонлик тизими, қўшинларнинг ташкил этилиши, қурол-яроғ, жанг санъати ва мудофаа иншоотлари ҳақидаги маълумотларни таҳлил қилиш, шунингдек, уларнинг давлат бошқаруви ва тараққиётида тутган ўрнини белгилашга алоҳида эътибор берилмоқда.  

ФА Тарих институти томонидан ўтказилган “Ёзма манбаларда Турон ҳарб иши тарихи” биринчи эллараро илмий йиғин ушбу йўналишда тадқиқотларни кенг йўлга қўйиш, бу борадаги илк илмий натижаларни эълон қилиш, мазкур соҳадаги муаммоларни аниқлаш ва уларнинг ечимини топишга қаратилди.

Йиғиннинг асосий қисми якунида ўзаро савол-жавоблар ва муҳокамалар қизғин тарзда ўтди. Таниқли олимлар ҳамда мутахассисларнинг тегишли тавсия ва мулоҳазалари тингланди.  

“Ёзма манбаларда Турон ҳарб иши тарихи”га бағишланган илмий йиғинда муҳокама этилган масалалар ўзбек ҳарб иши тарихи бўйича бор муаммо ва бўшлиқларни, шунингдек, бу йўналишда амалга оширилиши зарур бўлган илмий ҳамкорлик ва ташкилий ишлар аҳамиятини яққол кўрсатиб берди. Йиғин якунида уни анъанага айлантириш таклифи иштирокчилар томонидан бир овоздан маъқулланди.

<iframe width="650" height="420" src="https://www.youtube.com/embed/uezLsNPdveM" title="Yozma manbalarda Turon harb ishi tarixi " frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Муҳайё Турдалиева, Нишонбой Абдувоитов, ЎзА