Якшанба куни Буюк Британия, Канада, Австралия ва Португалия Фаластинни мустақил давлат сифатида тан олишини эълон қилди. Германия эса бу масалани музокарасиз ҳал қилмаслигини билдирган.

ГФР ташқи ишлар вазири Йоханн Вадефуль Фаластин фақат келишув натижасида тан олиниши керак, дея таъкидлаб, дарҳол тинчлик жараёнини бошлаш ва Ғазода ўқ узишни тўхтатишга чақирди. Шунингдек, зудлик билан сектор аҳолисига гуманитар ёрдамни кенгайтириш ва гаровга олинганларни қайдсиз-шартсиз озод қилиш зарурлигига урғу берди.  

Мулозим Исроил ҳарбий амалиётини “бутунлай нотўғри йўл” деб атади. Қатор Европа давлатлари томонидан бирин-кетин Фаластин давлат сифатида тан олинишини Исроил ва АҚШ қоралади. Бош вазир Биньямин Нетаньяҳу “Фаластин давлати ҳеч қачон бўлмайди”, дея таъкидлаб, Иордан дарёси Ғарбий соҳилидаги яҳудийлар яшаётан ҳудудни кенгайтиришга ваъда берди.

Хуллас, олмон давлати Фаластинни тан олиш ҳаракатига қўшилмаяпти.

– Германия учун Фаластинни тан олиш жараённинг охирида туради, – деди Вадефуль ўз ҳукуматининг айни масалага ёндашувини изоҳларкан. Бу фикрни ГФР ТИВ раҳбари июль ойида Яқин Шарққа сафари чоғида ҳам билдирган. Шу билан бирга мулозим бу йўл ҳозир “жуда узоқ” туюлаётганини тан олди. Яъни, халқаро ҳуқуқ нуқтаи назаридан ноқонуний ҳисобланган, босиб олинган Фаластин ҳудудларини эгаллашга қаратилган ҳар қандай ҳаракат можарони ҳал этиш, барқарорликка эришиш имкониятини заифлаштиришига эътибор қаратди.

<iframe width="560" height="315" src="https://www.youtube.com/embed/oI2i8D-5JHc?si=zTHQt-_2ozHdv7Kx" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Кенжа Бекжонов, Улуғбек Тўхтаев, ЎзА