Алишер Навоий номидаги Тошкент давлат ўзбек тили ва адабиёти университетида Япониянинг Сока университети делегацияси иштирокида йирик маънавий-маърифий тадбир ташкил этиди.
Тадбир аввалида университет ҳовлисидаги “Дўстлик боғи”да буюк мутафаккир Алишер Навоий ҳайкали пойига сакура кўчати экилди. Ушбу эзгу анъана Япония ва Ўзбекистон дўстлигини тамсил этиш баробарида Навоий ижодига меҳр қўйган, Сока университети асосчиси, тинчлик ва инсонпарварлик ғоялари тарғиботчиси доктор Дайсаку Икеда хотирасига бағишланди.
Шундан сўнг университет фоесида “Олам ичра танҳо – Навоий” номли фотокўргазманинг очилиш маросими бўлиб ўтди.
Унда Дайсаку Икеда томонидан чекилган ноёб фотосуратлар намойиш этилди. Делегация томонидан ТошДЎТАУга 35 та махсус тарихий суратлар туҳфа қилинди.
Университет анжуманлар залида давом этган учрашувда доктор Дайсаку Икеданинг ҳаёти ва фаолиятига бағишланган видеоролик намойиш этилди. Сўнг университет ректори академик Шуҳрат Сирожиддинов, Сока университети президенти профессор Судзуки, делегация раҳбари доктор Ёшиюки Нагаока ҳамда Ўзбекистон Республикаси Маданий мерос агентлиги раҳбарияти вакиллари сўзга чиқиб, Навоийнинг инсонпарварлик ва бағрикенглик ғоялари билан илгари сурган тинчлик фалсафаси ўртасидаги муштаракликни таъкидладилар. Тадбир якунида ТошДЎТАУ талабалари томонидан тайёрланган ижодий дастур меҳмонларга намойиш этилди.
Мазкур учрашув буюк аждодимиз Алишер Навоийнинг “ёр ўлинг бир-бирингизга” деган ҳикматли даъвати ва доктор Дайсаку Икеданинг тинчлик йўлидаги амалий фаолияти ўртасидаги уйғунликни яна бир бор намоён этди ҳамда Ўзбекистон ва Япониянинг таълим ва маданият соҳаларидаги ҳамкорлигини мустаҳкамлашга хизмат қилди.
<iframe width="640" height="420" src="https://www.youtube.com/embed/ciRYr6FRtm8" title="O`zbekiston va Yaponiya: ta’lim va madaniyat sohalarida hamkorlik mustahkamlanmoqda (+video)" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>М.Турдалиева, Н. Абдувоитов, ЎзА