АҚШ мудофаа вазирлиги “Олтин гумбаз” ракетага қарши мудофаа тизими лойиҳаси тайёрлигини маълум қилди, деб хабар тарқатди “Блумберг” идора маълумотига таяниб.

— Президент Дональд Трампнинг “Олтин гумбаз” тизимини яратиш режасига раҳбарлик қилаётган Фазовий кучлар генерали Майкл Гатлейн тегишли дастур лойиҳасини тайёрлади, — деб ёзган агентлик.

Қайд этилишича, икки ой олдин Гатлен мазкур ташаббус тафсилоти, жумладан харажат миқдори ҳақидаги ахборот билан бўлишишга ваъда берган, бироқ Пентагон ҳозирча бошқа маълумот бермаяпти.

Конгресснинг Бюджет бюроси “Олтин гумбаз” учун зарур бўладиган маблағ аввал мўлжалланганидан анча кўплигини айтяпти. Биргина космик тутқич учун 20 йил ичида 542 миллиард доллар сарфланади. Экспертлар лойиҳа параметрига киритиладиган эҳтимолий кичик ўзгариш ҳам юзлаб миллиард долларга тушиши мумкинлигини таъкидламоқда.

Май ойида Трамп ҳукумат янги ракетага қарши мудофаа тизими ташаббусига рози бўлганини маълум қилган. Мазкур лойиҳа қиймати тахминан 175 миллиард доллар. Қуруқлик, денгиз ва коинот тизимини ўзида жамлайдиган мазкур тизим етакчининг иккинчи муддати тугагунга қадар ишга туширилиши кутиляпти.

Кейинроқ CNN телеканали вазиятдан хабардор манбага таяниб “Олтин гумбаз”нинг дастлабки йирик синови 2028 йил охирига режалаштирилгани ҳақида хабар тарқатди.

С.Раҳимов, ЎзА