Ижтимоий тармоқларда тарқалган видео кенг жамоатчиликда жиддий эътирозларга сабаб бўлди. Инстаграм фойдаланувчиларидан бири турмуш ўртоғининг туғилган куни муносабати билан қўй сўйилганини эълон қилар экан, аслида ўзи тирик ва инсонга зарар етказмайдиган, Ўзбекистон Қизил китобига киритилган шарқ бўғма илонини ваҳшиёна тарзда ўлдириб, буни видеога ёзиб олган ва видеони тармоқда тарқатган.

Мутасаддиларнинг таъкидлашича, ҳайвонларни ўлдириш ёки қийнаш орқали кўнгилочар контент тайёрлаш — жамиятда зўравонлик ва бефарқликка олиб келади.

Тошкент шаҳар атроф-муҳитни муҳофаза қилиш ва иқлим ўзгариши бошқармасининг экологик назорат инспекцияси ушбу ҳолатни ўрганиши натижасида фуқаронинг ҳақиқатан ҳам ўз уйида илонни ўлдиргани аниқланган ва унга нисбатан Ўзбекистон Республикаси Маъмурий жавобгарлик тўғрисидаги кодекснинг 94-моддаси асосида маъмурий баённома расмийлаштирилган. 

Шу билан бирга, илоннинг нобуд қилиниши табиатга етказилган зарар сифатида баҳоланган ва Ўзбекистон Республикаси Вазирлар Маҳкамасининг 290-сонли қарори асосида ҳисоб-китоб қилиниб, зарар миқдори — базавий ҳисоблаш миқдорининг 30 баравари этиб белгиланган. 

Ҳозирда иш материаллари жиноят ишлари бўйича Сергели туман судига юбориш учун тайёрланмоқда. 

Экологлар таъкидлашича, шарқ бўғма илони инсонга зарар етказмайди, балки табиий муҳитда муҳим биоэкологик вазифани бажаради. Шу боис унинг йўқ қилиниши — нафақат қонунбузарлик, балки табиатга ҳам оғир зарба ҳисобланади.

М.Эшмирзаева, ЎзА