Футбол бўйича Ўзбекистон Суперлигаси 22-тури бугун, 18 сентябрь куни “Сурхон” – “Машъал” жамоалари баҳси билан бошланади ва 21 сентябрь кунига қадар давом этади.

Термиз шаҳридаги “Surxon Arena” стадионида ўтадиган мазкур учрашув маҳаллий вақт билан соат 18:30 да бошланади. Шу ўринда жамоаларнинг миллий чемпионатларимиздаги ўзаро ўйинлар статистикасига эътиборингизни қаратмоқчимиз. “Сурхон” ва “Машъал” бугунга қадар ўзаро 15 маротаба ўйнаган бўлса, унда “Машъал” 6 бор ғалаба қозониб, 5 та ўйинда дуранг қайд этган. “Сурхон” клуби 4 та ўйинда зафар қучган. Тўплар нисбати эса - 18/17 “Машъал” фойдасига.

Бу йил Суперлига баҳсларида “Сурхон” 24 очко билан 9-ўринда бораётган бўлса, “Машъал” 21 очко тўплаган ҳолда 12-поғонадан жой олган.

Эслатиб ўтамиз, Суперлиганинг 22-турида 19 сентябрь куни “ОКМК” – “Бунёдкор”, “Шўртан” – “Пахтакор”, 20 сентябрда “Хоразм” – “Қўқон-1912”, “Бухоро” – “Навбаҳор”, “Нефтчи” – “Динамо”, 21 сентябрда “Андижон” – “Сўғдиёна”, “Қизилқум” – “Насаф” учрашувлари ташкил этилади.

Ҳозирда миллий чемпионатимиз жадвалида “Насаф” 46 очко билан пешқадамлик қилаётган бўлса, “Нефтчи” 42 очко тўплаб иккинчи, “Пахтакор” эса 39 очко жамғариб, кучли учликдан жой олган.  

Жавоҳир Тошхўжаев,

ЎзА