Қонун лойиҳасига шарҳ
Бугун ахборот-коммуникация технологиялари жадал ривожланиб бораётган бир пайтда шахсларни суратга олиш ва бу тасвирдан унинг розилигисиз фойдаланиш ҳолатлари ортиб бормоқда. Биргина 2021-2024 йилларда бу турдаги ҳуқуқбузарликлар 2,5 баробарга ошган.
Эндиликда ҳар бир инсоннинг тасвири шахсий маълумот сифатида ҳимоя қилинади. Шахсни суратга олиш учун ҳам, ундан фойдаланиш учун ҳам розилик талаб этилади. Бу мажбурий талаб сифатида белгиланмоқда. Бунда болаларнинг ҳуқуқи алоҳида ҳимоя қилиниши кўзда тутилмоқда.
Ушбу тартиблар шахсларнинг тасвирга бўлган ҳуқуқлари ҳимоясини кучайтиришга қаратилган қонун лойиҳасида ўз ифодасини топган. Бу ҳақда Олий Мажлис Қонунчилик палатаси депутати Беҳзод Тўхтамуродов батафсил сўзлаб берди.
Депутат қайд этганидек, бугунги ахборот-коммуникация даврида айрим ҳолларда шахсларнинг тасвиридан фойдаланиш билан боғлиқ муносабатларда шахсий дахлсизлик ҳуқуқи уни амалга ошириш механизмлари билан таъминланмагани сабабли айрим ҳолларда чекланмоқда. Қонун лойиҳасида шахсни тасвирга олиш ва ундан фойдаланиш учун розилик олиш мажбурий шартлиги, ушбу муносабатларда вояга етмаган болалар мустақил ҳуқуқ субъекти эканлиги, тасвирга олиш ва ундан рухсатсиз фойдаланиш мумкин бўлган ҳолатлар доираси белгиланмоқда.
Бунда болаларнинг ҳуқуқи алоҳида ҳимоя қилиниши назарда тутилган бўлиб, 16 ёшгача бўлган болалар ота-она розилиги билан, 16 ёшдан кейин эса боланинг ўзи қарор қилиши белгиланмоқда.
Шунингдек, видеокузатувни амалга оширишда шахсий дахлсизликни таъминлашга оид талаблар, тасвирдан рухсатсиз фойдаланилганда келиб чиқадиган ҳуқуқий оқибатлар аниқ белгиланмоқда.
Қонун лойиҳаси фуқароларнинг шахсий ҳуқуқлари ва эркинликлари кафолатлари, шахсий дахлсизлик ҳуқуқи янада мустаҳкамланишига хизмат қилади.
<iframe width="650" height="420" src="https://www.youtube.com/embed/BCntRnW373Q" title="Shaxsni suratga tushirishda rozilik olish majburiy bo`ladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Муҳтарама Комилова, Нишон Абдувоитов (видео), ЎзА