Бундан қарийб икки ҳафта олдин Ўзбекистон миллий терма жамоаси марказий ҳимоячиси Абдуқодир Ҳусанов “Манчестер Сити” сафида “Брайтон”га қарши учрашув пайтида жароҳат олган эди ва тикланиш муддати камида 14 кунни ташкил этиши белгиланган эди.

Сўнгги хабарларга кўра, клубнинг “City Football Academy” базасида ташкил этилган биринчи жамоавий машғулотида жароҳатидан қутулган саккиз нафар футболчи орасида Абдуқодир Ҳусанов ҳам иштирок этди.

Бу эса катта эҳтимол билан “МС”нинг навбатдаги учта муҳим ўйинида Абдуқодирнинг майдонга тушишига умид бағишлайди.  

Аниқроқ айтадиган бўлсак, “Манчестер Сити” Англия Премьер-лигасининг тўртинчи турида 14 сентябрь куни ўз майдонида “Манчестер Юнайтед”ни қабул қилса, 18 сентябрь куни Европа Чемпионлар лигаси умумий босқичи биринчи турида Италия чемпиони “Наполи” клубини меҳмон қилади. 20 сентябрь куни эса миллий чемпионат доирасида “Арсенал” билан сафарда ўйнайди.  

Ҳа, мазкур ўйинларга қадар Абдуқодир Ҳусанов тўлиқ тикланиб, “Манчестер Сити” жамоаси сафига қайтади ва клубдаги ёрқин ўйинларини намойиш этади.

Маълумот ўрнида: Англия Премьер-лигаси тўртинчи туридан ўрин олган “Манчестер Сити” ва “Манчестер Юнайтед” баҳси Тошкент вақти билан соат 20:30 да бошланади.

Жавоҳир Тошхўжаев,

ЎзА