Дзюдочиларимиз Осиё чемпионатини 8 та медаль билан бошлади
Индонезия пойтахти Жакарта шаҳрида ўтаётган кадетлар ўртасидаги Осиё чемпионатининг биринчи кунида Ўзбекистон терма жамоаси 8 та медалга сазовор бўлди.
Жумладан, мусобақанинг -40 кг. вазнида Дилафрўз Болтабоева финал беллашувида бошқа бир дзюдочимиз Моҳинур Оллобергановани енгиб, олтин медалга эга чиқди. Моҳинур эса кумуш медаль билан тақдирланди.
Вазни -48 кг. бўлган Наргиза Дўстмаматова барча рақибларини таслим этган ҳолда термамиз ҳисобига иккинчи олтинни келтирди. Шунингдек, Муҳаммадкарим Носиров (-60 кг) ва Санжарбек Ашуров (-66 кг) ўз вазнларида мусобақа ғолибига айланди.
Илк кунги беллашувларда Нигина Умрзоқова кумуш, Муҳаммадкарим Шодмонов ва Абубакр Сатторов бронза медали билан тақдирланди.
Жавоҳир Тошхўжаев, ЎзА