Бугун Тошкентдаги “Ўзэкспомарказ” миллий кўргазмалар мажмуасида Глобал тўқимачилик ҳафталигининг якуний тадбирлари бўлиб ўтди.

Учта муҳим тадбирни ўз ичига олган ушбу ҳафталикда 22 та мамлакатдан 250 дан ортиқ компания ва брендлар ўз маҳсулот ҳамда технологияларини тақдим этди. Тадбирлар доирасида бой ва самарали бизнес дастури ҳам ташкил этилди.

Мутахассисларнинг фикрига кўра, ҳафталик тўқимачилик ва тикувчилик, шунингдек, машинасозлик соҳасидаги жаҳон ишлаб чиқарувчиларининг маҳсулотларини намойиш этиш учун кенг платформа ҳисобланади. Бу йилги тадбир нафақат соҳадаги сўнгги инновация ва технологияларни тақдим этиш, балки маҳаллий ишлаб чиқарувчиларни қўллаб-қувватлашга ҳам катта эътибор қаратди.

“Santoni (Shanghai) Knitting Machinery Co., Ltd.” компанияси савдо менежери Питер Валсекки 10 йилдан буён ушбу кўргазмаларда мунтазам иштирок этиб келаётганини таъкидлади.

– Шу давр мобайнида бу бозорда барқарор бизнес алоқаларини йўлга қўйдик. Чунки пахтадан ип, ипдан мато, матодан эса тайёр кийим-кечак ишлаб чиқариш жараёни бутун бир занжирни ташкил этади. Шу боис, бу бозор биз учун катта аҳамиятга эга. Умуман олганда, бундай кўргазмаларда иштирок этиш жуда самарали. Ўзбекистон билан ҳамкорлик ҳам биз учун муҳим. Ўзбекистонлик ҳамкорлар билан шериклик жуда яхши йўлга қўйилган. Бизда ишончли ва барқарор мижозлар бор, улар такрорий буюртмалар бериб туришади. Ўрни келганда, кўргазмани ташкил этганларга ва ҳамкорларимизга чуқур миннатдорлик билдираман, – деди Питер Валсекки.

Таъкидлаш жоизки, ҳафталикда ҳар бир иштирокчи ўз маҳсулот ва технологияларини намойиш қилиш билан бирга, хорижий харидорлар ва ҳамкорлар билан тўғридан-тўғри мулоқот қилиш имконига эга бўлди. Бу эса янги савдо шартномалари ва ҳамкорлик алоқаларини ўрнатишда муҳим қадам ҳисобланади.

<iframe width="640" height="480" src="https://www.youtube.com/embed/Xv3Myt7mNGE" title="“Global Textile Days” haftaligi o‘z ishini yakunladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Насиба Зиёдуллаева, Анвархўжа Аҳмедов (монтаж), ЎзА