Тошкент шаҳрида қиличбозлик бўйича кадетлар ўртасида Осиё кубоги ўтказилмоқда. Унда 11 мамлакатдан келган 207 нафар қиличбозлар рақобатлашмоқда. Мусобақанинг илк кунида иштирокчилар сабля ҳамда рапира қуролида ўз омадларини синовдан ўтказди.

Йигитлар ўртасида рапира беллашувларида Али Ал-Бусаиди (Уммон), Чеонг Пак Кио (Макао), Евгений Токанов (Қозоғистон) ва Мансур Естеу (Қозоғистон) шоҳсупага кўтарилди. Қизлар орасида эса ҳамюртимиз Сабина Адашева барча рақибларини орта қолдирган ҳолда олтин медалга сазовор бўлди. Сингапурлик Вонг Ангеллина Ян кумуш, қозоғистонлик Алуа Муканова ҳамда ёш қиличбозимиз Муслима Ҳусанова бронза медали билан тақдирланди.

Ўғил болалардан иборат жамоавий беллашувларда Қозоғистон, Макао, Ўзбекистон ва Ироқ терма жамоалари ғолиб ва совриндор бўлишди.

Сабля беллашувларида эса ҳамюртларимиз Салима Рўзиева ва Бибиайша Ҳусанбоева финал босқичида куч синашди. Мазкур баҳсда  Салима ғолиб бўлди ва олтин медални қўлга киритди. Шунингдек, Наиля Исхакова (Қозоғистон), Перизат Мауинбергенова (Ўзбекистон) бронза медалини қўлга киритди.

Сабля бўйича жамоавий беллашувларда Ўзбекистон терма жамоаси биринчи ўриндан жой олган бўлса, Қозоғистон термаси иккинчи бўлди. Шунингдек, Қозоғистон ва Ўзбекистоннинг иккинчи жамоаси шоҳсупанинг учинчи поғонасидан жой олди.

Жавоҳир Тошхўжаев,

ЎзА