Президент Владимир Зеленский Украина қўшини фойдаланаётган қуролнинг қарийб 60 фоизи маҳаллий ишлаб чиқарувчилар маҳсулоти эканини таъкидлади, деб ёзган "РИА Новости".
Ушбу маълумот куни кеча Зеленский томонидан Данияда ракета ва дрон учун бутловчи қисм ишлаб чиқарадиган қурол-яроқ заводи қурилиши бошлангани эълон қилингач ошкор бўлди.
4 июль куни Украина стратегик саноат вазири Герман Сметанин мамлакат ҳарбий-саноат компаниялари Данияда қурол тайёрлашни йўлга қўйиши ҳақида гапирганди. Аввалроқ мудофаа вазири Рустем Умеров Киев ва Копенгаген ўртасида биргаликда ҳарбий аслаҳа ишлаб чиқаришга йўл очадиган англашув меморандуми имзолангани ҳақида хабар берган. Зеленский ҳам мамлакат Европанинг бир неча давлатида қурол ишлаб чиқариш тизими очиш ниятидалигини таъкидлаганди.
Маҳаллий “Общественное” телеканали айни режада Дания, Норвегия, Германия, Буюк Британия ва Литва назарда тутилганини маълум қилган.
Президентнинг стратегик маслаҳатчиси Александр Камишин июль ойи бошида Украина қуролининг биринчи жамланмаси кейинги йил Даниядаги заводда ишлаб чиқарилиши кутилаётганини айтган.
С.Раҳимов, ЎзА