АҚШ президенти Дональд Трампнинг “сўнгги огоҳлантириши”дан сўнг ҲАМАС ҳаракати Ғазо секторидаги урушни тўхтатиш ва “барча маҳбусларни” озод қилиш учун зудлик билан музокаралар столига ўтиришга тайёрлигини эълон қилди.
ҲАМАСнинг 7 сентябрь куни кечқурун тарқатган баёнотига кўра, улар воситачилар орқали АҚШ томонидан ўт очишни тўхтатишга қаратилган “баъзи таклифларни” олган. Фаластин ҳаракати исроиллик маҳбусларни озод қилиш эвазига Исроилдан “урушни тўхтатиш, Ғазо секторидан қўшинларни тўлиқ олиб чиқиш ва Ғазони бошқариш учун мустақил фаластинликлар қўмитасини тузиш тўғрисида аниқ баёнот” талаб қилмоқда. Трамп Исроил келишув бўйича у таклиф қилган шартларни қабул қилганини айтганди.
АҚШ президенти Дональд Трамп 7 сентябрь куни Россияга қарши санкциялар жорий этишнинг иккинчи босқичига тайёрлигини билдирди. Бу ҳақда Al Arabiya хабар берди. Бу санкциялар Россиянинг Украинада олиб бораётган уруши сабабли ҳамда рус нефтини харид қилаётганларга қарши босимни кучайтириш учун жорий этилмоқда. АҚШ президенти шу кунгача Москва билан музокаралар орқали тинчликка эришиш мақсадида санкциялар жорий этишни чўзиб келаётган эди. Аммо сўнгги изоҳлар Трамп позициясининг тобора кескинлашаётганидан дарак бермоқда.
Саудия Арабистони Сурия пойтахти Дамашқни вайроналардан тозалаш ва қайта қуришда мамлакатга ёрдам беришини маълум қилди. Бу ҳақда Al Jazeera хабар берди. Ташаббус вайроналарни тозалаш ва қайта қуриш ишларини ўз ичига олган янги гуманитар лойиҳа асосида амалга оширилади. Бу қиролликнинг Сурия ҳукумати билан алоқаларини янада мустаҳкамлаётганидан дарак бермоқда.
Исроил Олий суди 7 сентябрь куни ҳукуматни фаластинлик маҳбусларга етарли озиқ-овқат бермаётганликда айблаб, овқат миқдори ва сифатини яхшилаш бўйича топшириқ берди. Суд ҳукуматга фаластинлик маҳбусларга кунига 3 маҳал овқат бериш мажбурияти борлигини эслатган. Бу қарор 2024 йилда инсон ҳуқуқлари ташкилотлари томонидан киритилган шикоят асосида қабул қилинган эди. Исроил миллий хавфсизлик вазири Итамар Бен-Гвир суд қарорига қарши чиқиб, маҳбусларга қонунда белгиланган минимал шароитлар берилишини айтган. АCРИ инсон ҳуқуқлари ташкилоти ҳукуматдан қарорни дарҳол бажаришни талаб қилиб, Исроил қамоқхоналари “қийноқлар лагерига айланган”ини таъкидлаган.
Қозоғистоннинг Туркистон вилоятида Кўксарой контррегуляторининг бош гидроузелини механик тозалаш ишлари бошланди. Бу қуриб қолган Орол денгизини сув билан тўлдиришда муҳим чора ҳисобланади. Бу ҳақда Zakon.kz (https://zakon.kz/) хабар берди. Янгиликни мамлакат сув ресурслари ва суғориш вазирлиги матбуот хизмати эълон қилган. Унга кўра, мазкур объект 8 сентябрдан бошлаб махсус техника ёрдамида лой ва қумдан тозаланмоқда. Бу ишлар сув тошадиган даврда эриган қор сувларини хавфсиз йўналтириш имконини беради.
АҚШдан яна 39 киши 2025 йил 7 сентябрь куни Ўзбекистонга депортация қилинди. Бу ҳақда АҚШнинг Тошкентдаги элчихонаси хабар берди. АҚШда қонуний қолиш ҳуқуқига эга бўлмаган Ўзбекистон фуқаролари самолётда ватанга қайтарилди.
“Ушбу парвоз АҚШ ўз чегараларини мустаҳкамлаш бўйича олиб бораётган давомли ҳаракатлар тизимининг навбатдаги қисми ҳисобланади”, дейилади элчихона хабарида.
<iframe width="640" height="420" src="https://www.youtube.com/embed/XMl3TyZ7zH4" title="Xalqaro dayjest" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Ирода Жўраева, Улуғбек Тўхтаев (видео), ЎзА