Бугун, 7 сентябрь куни пойтахтимиздаги “Юнусобод” спорт мажмуасида футзал бўйича давом этаётган Олий лига 1-тур ўйинларининг сўнгги учрашувлари бўлиб ўтади.

Кеча турнинг бешинчи кунида Қаршининг Насаф” жамоаси Термизнинг “Сурхон” футзалчилари билан рўбарў келди. Қизиқарли кечган учрашувда қаршиликларнинг қўли баланд келди.

“Динамо” “Қизилқум” “дуэли”да 2:2 ҳисоби қайд этилиб, муроса йўли танланди. Ушбу натижа навоийликларга бир очко тақдим этиши билан уларни хавфли чизиқдан юқорилашини таъминлади.

Бешинчи куннинг сўнгги ўйинида чемпионатда энди иштирокини бошлаган SQB жамоаси тажрибали “Нефтчи”га қарши ишончли ҳаракат қилди. Бу натижада ҳам ўз аксини топди. Учрашув 4:1 кўринишида SQB футзалчилари ғалабаси билан якунланди.

Бугун турнинг охирги кунида “Динамо” “Сурхон” билан, SQB “Қизилқум” билан, “Насаф” “Нефтчи” билан куч синашади.

Айнан бугунги ўйинлар 1-турда қайси жамоалар Олий лига баҳсларида етакчиликка даъвогар эканлиги билан аҳамиятлидир.

Т. Рўзиев, ЎзА