ЕХҲТнинг Ўзбекистондаги лойиҳалари координатори томонидан икки муҳим сана – ташкилотнинг асосий ҳужжати ҳисобланган Хельсинки якуний акти имзоланганига 50 йил ва ЕХҲТнинг Ўзбекистонда фаолият юритаётганига 30 йил тўлганига бағишланган тадбир ўтказилди.

Тадбир давлат идоралари, дипломатик корпус, халқаро ва жамоат ташкилотлари вакиллари, шунингдек, кўп йиллик ҳамкорларни бирлаштириб, биргаликдаги фаолият натижаларини сарҳисоб қилиш ва умумий мақсадларга содиқликни яна бир бор тасдиқлашга хизмат қилди. 

ЕХҲТ амалдаги раисининг махсус вакили, элчи Терхи Ҳакала бундан 50 йил муқаддам имзоланган Хельсинки якуний актида акс этган ғоя ва қадриятлар ҳозир ҳам долзарб аҳамиятга эга эканлигини таъкидлади. 

– Ушбу муҳим санани нишонлар эканмиз, биз Хельсинки якуний акти руҳи ва тамойилларига содиқлигимизни яна бир бор тасдиқлаймиз. Геосиёсий, экологик, ижтимоий ёки бошқа замонавий таҳдидлар ҳамжиҳатлик ва яқин минтақавий ҳамкорликни талаб этади. Минтақавий дипломатия ва ислоҳотларда муҳим роль ўйнаётган Ўзбекистон бу йўлда бизнинг асосий ҳамкоримиз бўлиб қолмоқда, – деди Т.Хакала. 

Ўз навбатида, ЕХҲТнинг Ўзбекистондаги лойиҳалари координатори, элчи Антти Карттунен ўз нутқида сўнгги 30 йил давомида ЕХҲТ Ўзбекистон билан яқин ҳамкорлик қилиб, ислоҳотларни амалга ошириш, давлат институтларини мустаҳкамлаш, инсон ҳуқуқларини илгари суриш ва хавфсизликни таъминлашга кўмаклашиб келаётганини қайд этди. 

– Бугун биз муҳим санани нишонлаяпмиз, аммо асосий эътиборимиз келажакка қаратилмоғи лозим. Барқарор ва адолатли жамият барпо этишда ёшларнинг ўрни беқиёс. Уларни ушбу жараёнга жалб этиш ва қўллаб-қувватлаш ҳал қилувчи аҳамиятга эга, – деди А.Карттунен. 

Тадбир ЕХҲТ тамойилларини Ўзбекистонда ва минтақавий миқёсда илгари суришга бўлган қатъий содиқликни яна бир бор тасдиқлади. 

Азиза Алимова, ЎзА