Олий Мажлис Сенатининг ўнинчи ялпи мажлиси якунига етди. Икки кун давом этган мажлисда Сенат ва Ҳукумат аъзолари, вазирлик ва идоралар раҳбарлари, оммавий ахборот воситалари вакиллари иштирок этди.

Сенат Раиси Танзила Норбоева бошқарган мажлис давомида 9 та қонун кўриб чиқилди. Шундан масъулияти чекланган жамиятлар, ноширлик, Жаҳон савдо ташкилоти, кредиторлар,  транспорт, таълим билан боғлиқ 8 та қонун маъқулланди. 

“Давлат ижтимоий суғуртаси тўғрисида”ги қонун эса рад этилди.   

Ялпи мажлисда Бош прокурорнинг прокуратура органларининг 2024 йилдаги фаолияти юзасидан ҳисоботи  эшитилди. 

Бош прокурор Ниғматилла Йўлдошев прокуратура органлари томонидан аҳолини ижтимоий муҳофаза қилиш, бандлигини таъминлаш ва эҳтиёжманд оилаларни қўллаб-қувватлашга алоҳида эътибор қаратилаётганини таъкидлади.  

3 минг 561 та яширилган жиноят аниқлангани қайд этилди. Жиноятларни қасддан яширган ходимларга нисбатан 22 жиноят иши қўзғатилган.

– Тергов ва тезкор қидирув фаолияти устидан назоратни таъминлашга ҳам устувор аҳамият қаратилди, - деди Н.Йўлдошев. – Хусусан, тезкор-қидирув  фаолияти устидан назорат кескин кучайтирилиб, пинҳона шароитларда содир этилган 30 мингдан ортиқ жиноят фош этилди ҳамда қидирувдаги 8,7 мингдан зиёд шахснинг ушланиши таъминланди. Ўз навбатида, 78 минг 544 нафар шахсга нисбатан 63 минг 459 жиноят иши судларга юборилди. Бевосита прокуратура органлари томонидан 14,7 мингдан ортиқ жиноят иши бўйича дастлабки тергов ўтказилиб, айбланувчилардан 3,1 триллион сўмлик зарар ундирилди. Тезкор-қидирув ва тергов фаолиятини амалга оширишда шахсни қийноққа солиш ва бошқа ғайриқонуний хатти-ҳаракатлар билан боғлиқ ҳар бир қилмишга нисбатан кескин муносабат билдирилмоқда. Хусусан, бундай ғайриинсоний қилмишлар ҳақида келиб тушган 200 га яқин ариза ва хабарлар юзасидан текшириш ўтказилиб, 7 таси юзасидан жиноят иши қўзғатилди. 5 нафар ҳуқуқ-тартибот ходими жиноий жавобгарликка тортилди. 

Ушбу масала юзасидан фикр билдирган Сенат Раиси Танзила Норбоева бундан бир неча йил муқаддам таълим тизимида, давлат харидлари соҳасида коррупция даражаси юқори бўлганини қайд этди. Бунга барҳам бериш учун Коррупцияга қарши курашиш миллий кенгаши доирасида Бош прокуратура билан ҳамкорликда тизимли ишлар амалга оширилгани натижасида айнан шу йўналишларда коррупция ҳолатлари кескин камайди.

Мажлисда Самарқанд вилоятининг айрим ҳудудлари чегараларини ўзгартириш,  қишлоқ хўжалигини ривожлантириш, илмий-тадқиқот институтларининг моддий-техник базасини мустаҳкамлаш ва соҳага илм-фан ютуқларини жорий қилиш бўйича парламент сўрови натижалари, Олий суд таркибига ўзгартиришлар киритиш тўғрисидаги масалалар ҳам кўриб чиқилди.  

Ўзбекистон Республикасида коррупцияга қарши курашиш тўғрисидаги миллий маъруза эшитилди. Ушбу масала юзасидан маъруза қилган Коррупцияга қарши курашиш агентлиги директори Акмал Бурҳонов жамиятда коррупция иллатига нисбатан муросасиз муҳитни шакллантиришга қаратилган тизимли ислоҳотлар амалга оширилаётганини таъкидлади. 

Сенаторлар томонидан коррупцияга қарши курашиш соҳасида айрим камчиликлар сақланиб қолаётгани қайд этилди. Коррупцияга оид жиноятларни таҳлил қилган ҳолда жиноятлар кўрсаткичи ошган давлат органлари ва ташкилотларида кечиктириб бўлмайдиган чора-тадбирларни белгилаш лозимлиги алоҳида таъкидланди.  

<iframe width="650" height="420" src="https://www.youtube.com/embed/oqcvmqNah5k" title="SЕNAT: jinoyatchilik va korrupsiyaga qarshi kurashish kuchaytiriladi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Норгул Абдураимова,

                   Дониёр Якубов (видео),

Анвар Аҳмедов (монтаж), ЎзА