“Хоҳловчилар коалицияси” деб аталувчи ташкилот таркибига кирувчи Европа давлатлари Украинага хавфсизлик кафолати беришга тайёр, фақат АҚШдан тегишли “қўллаб-қувватлов”ни кутмоқда, дея хабар бермоқда “Франс Пресс” Президент Эммануэль Макроннинг исми ошкор этилмаган маслаҳатчисига таяниб.

– Европаликлар бугун Елисей саройидаги учрашув ва видеоконференцияда Украинага хавфсизлик кафолати беришга “тайёрликлари”ни тасдиқлайди ва энди Америкадан аниқ “қўллаб-қувватлаш” кутилади, – деб ёзган агентлик.

“Monde” газетаси душанба куни Елисей саройига таяниб, Макрон ва Буюк Британия Бош вазири Кир Стармер пайшанба куни Парижда Украина бўйича “Хоҳловчилар коалициясининг” навбатдаги йиғилишини ўтказади, деб хабар тарқатганди. Эртасига “Times” газетаси АҚШ Президенти маъмурияти учрашувда иштирок этмаслигини эълон қилди.

Маълумки, Дональд Трамп 18 август куни Оқ уйда Владимир Зеленский ва Европа етакчиларини қабул қилиб, учрашув чоғида Америка етакчиси Киев олиши мумкин бўлган хавфсизлик кафолатини НАТОда мавжуд кафолат билан қиёсламаслигини таъкидлаган. Шунингдек, ўзининг президентлиги даврида Украинага Америка қўшини юборилмаслигини қўшимча қилган.

”Блумберг” агентлиги фикрича, Қўшма Штатлар ва Европанинг Киев режими учун хавфсизлик кафолати кўп миллатли кучларни бирлаштириши мумкин бўлган “хоҳловчилар коалицияси” ишига асосланади.

Кейинроқ Франция раҳбари айни йўналишдаги иш якунланганини билдирди.

Президент маърузаси Елисей саройининг ижтимоий тармоқдаги саҳифасида намойиш қилинди.

– Европаликлар тинчлик битими имзоланиши биланоқ Украина ва украиналикларга хавфсизлик кафолати беришга тайёр бўлади, – деган у Владимир Зеленский иштирокида ўтган матбуот анжуманида. – Биз Вашингтонда зиммамизга шундай мажбурият олганмиз. Тайёргарлик ишлари якунланган.
Мазкур баёнот бугун Парижда аралаш форматда кечадиган “Хоҳловчилар коалицияси”нинг навбатдаги йиғилиши арафасида ошкор қилинди.

С.Раҳимов, ЎзА