Қўшма Штатлар ҳарбийлари Венесуэла қирғоқлари яқинида ноқонуний наркотик моддаларни ташувчи кемага зарба бериб, 11 кишини ўлдирди, деб ёзмоқда “Reuters” ахборот агентлиги.

Кейинроқ, Дональд Трамп ўзининг “Truth Social” платформасида дрон ёрдамида портлатилган қайиқнинг тасвирларини баҳам кўрди.

Трампнинг айтишича, экипажда АҚШ февраль ойида террорчилик гуруҳи деб эълон қилган “Tren de Aragua” аъзолари бўлган.

Қизиқ жиҳати, Венесуэла алоқа вазири Фредди Нанес ижтимоий тармоқдаги постида АҚШ етакчиси томонидан тақдим этилган видео сунъий интеллект ёрдамида тайёрланганини таъкидлади.

Пентагон ҳозирча бортда қандай гиёҳванд моддалар бўлгани, унинг миқдори ва зарба қандай амалга оширилгани ҳақида аниқ маълумот бермади.

Хорижий ОАВда ёзилишича, АҚШнинг экипаж аъзоларини қўлга олиш ўрнига Кариб денгизи орқали сузаётган “номаълум” кемани портлатиши жуда ноодатий ва бу ҳолат бир вақтлар Қўшма Штатларнинг жангари гуруҳларга қарши кураши ҳақидаги хотираларни уйғотади. 

– Гиёҳванд моддаларни олиб ўтишда гумон қилиниш ўлим жазосини ўз ичига олмайди, - деди Лотин Америкаси бўйича Вашингтон бюросининг мудофаа назорати бўйича раҳбари Адам Исаксон.

Аввалроқ, “Reuters” Пентагондаги манбасига таяниб, АҚШ ҳарбий-денгиз кучлари наркотик картелларига қарши курашга қаратилган операцияларни ўтказиш учун Венесуэла қирғоқлари яқинидаги Кариб денгизининг жанубий қисмига учта ҳарбий бўлинма жўнатгани ҳақида хабар берганди.

“The New York Times” газетасининг ёзишича, Трамп яширинча Лотин Америкаси наркокартелларига қарши ҳарбий куч ишлатиш бўйича кўрсатмани имзолаган. 

– Ушбу гиёҳванд моддалар Тринидад ёки Кариб ҳавзасидаги бошқа давлатга йўлланган бўлиши мумкин, -деди АҚШ Давлат котибиМарко Рубио журналистлар билан суҳбатда.

Ў.Алимов, ЎзА