Ўзбекистонда картошка энгкўп етиштириладиган ваистеъмол қилинадиган асосий қишлоқ хўжалиги экинларидан бири. Бу маҳсулот аҳолининг кундалик озиқ-овқат рационида муҳим ўрин тутади. Қишлоқ хўжалиги, шунингдек, экспорт соҳалари учун ҳам катта аҳамиятга эга.
Миллий статистика қўмитаси маълумотларига кўра, 2025 йилнинг январь-июнь ойларида республикамизда картошка етиштириш ҳажми 1,9 миллион тоннага етди. Бу эса ўтган йилнинг мос даврига нисбатан 3,4 фоизга ўсишни кўрсатади.
Ҳудудлар кесимида картошка етиштиришда Самарқанд вилояти етакчи. Яъни, бу ҳудудда январь-июнь ойларида 334,3 минг тонна картошка етиштирилган. Бу ерда об-ҳаво шароитлари ва тупроқнинг унумдорлиги картошка етиштиришга қулай бўлиб, қишлоқ хўжалиги инфратузилмаси яхши ривожланган. Сурхондарё вилояти эса 247,5 минг тонна картошка етиштирган ҳолда иккинчи ўринда. Бу вилоятнинг иқлим шароитлари ва қишлоқ хўжалиги маҳсулотларини етиштиришдаги унумдорликка боғлиқ.
Андижон ва Фарғона вилоятлари ҳам картошка етиштиришда муҳим ўрин тутади. Уларнинг ҳар бири 230 минг тоннадан ортиқ картошка етиштирган. Бухоро, Наманган, Тошкент, Қашқадарё ва бошқа ҳудудлар ҳам сезиларли даражада картошка етиштиришни таъминлаяпти, аммо улардаги маҳсулот ҳажми етакчи ҳудудларга нисбатан камроқ. Бундай тафовутлар асосан ҳудудларнинг табиий-иқлим шароитлари, суғориш имкониятлари, ерларнинг унумдорлиги ва қишлоқ хўжалиги технологияларини қўллаш даражасига боғлиқ.
Яна бир муҳим жиҳат картошка етиштириш ҳажмининг ортиши ички бозор талабларини таъминлаш билан бир қаторда, экспорт имкониятларини кенгайтириш учун ҳам муҳим ҳисобланади. Шу боис, фермерларга қўшимча ёрдам кўрсатиш, инновацион усулларни жорий этиш ва ерларни самарали бошқариш орқали картошка етиштиришни янада ошириш истиқболлари мавжуд.
Умуман олганда, 2025 йилнинг дастлабки олти ойидаги картошка етиштириш кўрсаткичлари қишлоқ хўжаликда барқарор ўсиш ва ривожланишнинг ёрқин далили бўлиб, ҳудудлараро рақобат ва ҳамкорликни кучайтириш орқали озиқ-овқат хавфсизлигини янада мустаҳкамлаш имконини беради.
Дилдора ДЎСМАТОВА
ЎзА