Сурия нефти жаҳон бозорига қайтиши мамлакат иқтисодиётини тиклаш йўлидаги дадил қадамдир.
SANA хабарига кўра, ушбу араб давлати нефть транспорти компанияси кейинги 14 йил ичида биринчи марта расман маҳсулот етказиб беришини маълум қилди.
“BB Energy” глобал трейдери “B Serve Energy” халқаро компанияси учун Тартус портидаги “Nissos Christiana” танкерига 600 000 баррель оғир нефть юкланди. Энергетика вазирлиги маълумотига кўра, экспорт қилинадиган хом ашё бир неча кондан қазиб олинган, шунингдек Банияс ва Хомсдаги нефтни қайта ишлаш заводларида тўпланган ортиқча маҳсулотдан иборат.
Тартусдан 35 км шимолдаги Баниясда Суриянинг энг йирик нефтни қайта ишлаш заводи ва ихтисослашган нефть порти жойлашган. Вазирликнинг Нефть ва газ департаменти директори ёрдамчиси Риёд Ал-Жубасий “Reuters” мухбирига айтишича, келишув жорий йил июнь ойида АҚШ санкцияси бекор қилингандан кейин амал қила бошлаган.
– Бу транспорт тизими, танклар ва денгиз терминалининг тўлиқ фойдаланишга тайёрлигини тасдиқловчи муҳим тажриба, – деган мулозим.
Маҳаллий матбуот нефть экспорти Сурия ҳукумати кўрсатмаси ва Энергетика вазирлиги қошидаги Нефть Бош бошқармаси ишлаб чиққан мамлакатнинг ташқи нефть бозоридаги иштироки кўламини кенгайтириш режаси доирасида йўлга қўйилаётганини таъкидламоқда.
– Умид қиламизки, экспорт жараёни энди узлуксиз давом этади, – дейди Нефть транспорт компанияси бош директори Маън Баша. – Саноатни модернизация қилиш лойиҳалари маҳаллий мутахассислар томонидан амалга оширилмоқда. Нефть конларининг аксарияти мамлакат шимоли-шарқида, курд ҳукумати назорати остидаги ҳудудда жойлашган. Конлар февралдан Дамашқдаги марказий ҳукуматга хом ашё етказиб бера бошлади.
2011 йилдаги фуқаролар урушигача нефть ялпи ички маҳсулотнинг 20 фоизи, экспортнинг ярми ва давлат даромадининг 50 фоиздан ортиғини ташкил қилган. Ўша пайт кунига 380 000 баррель нефть экспорт қилинган. 14 йиллик уруш иқтисодиёт ва инфратузилмани вайрон қилди ва конлар қайта-қайта қўлма-қўл бўлди. Натижада Сурия электр энергияси ишлаб чиқариш бўйича Эрон нефтига қатъий боғланиб қолди. 2024 йил декабрида Башар Асад ҳокимиятдан ағдарилгач эса таъминот тўхтади.
Шу боис энди янги раҳбарият соҳани тиклаш, хорижий компаниялар билан ҳамкорлик ўрнатиш ва мамлакатга валюта жалб қилиш учун кенг кўламли ислоҳот олиб бормоқда.
Г.Сатторова. ЎзА